Erling Haaland បានឈានមកដល់វ័យ ២១ ឆ្នាំហើយ នៅថ្ងៃទី ២១ កក្កដា ឆ្នាំ ២០២១ នេះ។ យុវជនសញ្ជាតិន័រវែសបានបង្កើតផ្លែផ្កាជោគជ័យជាច្រើន ជាពិសេសពាក់ព័ន្ធនឹងការរកគ្រាប់បាល់ ដែលបច្ចុប្បន្ននាំឲ្យគេកំពុងក្លាយជាកីឡាករមានហាងឆេងថ្លៃខ្លួនខ្ពស់បំផុតមួយ បន្ទាប់ពី Kylian Mbappe។
ក្នុងចំណោមជោគជ័យជាច្រើនដែល Haaland ធ្លាប់បានធ្វើកន្លងមក យើងសូមច្បិចជ្រុងមួយមករំឭកឡើងវិញ ពាក់ព័ន្ធនឹងការប្រើប្រាស់ល្បឿន ដែលជឿថាគ្នាយើងច្រើននៅចាំ ការរត់ប្រើល្បឿនដ៏លឿនរបស់គេកាលពីប្រកួតទល់ PSG នៅ Champions League។
នៅកំឡុងខែកុម្ភៈ ឆ្នាំ ២០២០ ក្នុងការប្រកួតរវាង PSG-Dortmund នៅបាល់ Counter Attack ពេលដែល Jadon Sancho ព្យាយាមអូសបាល់ឡើងទៅលើ ក៏ឃើញមាន Haaland រត់មកយ៉ាងលឿន ដ្បិតមិនទទួលបានការបញ្ជូនបាល់ក្តី តែគេនៅតែជឿថា សន្ទុះនៃល្បឿនរបស់ខ្សែប្រយុទ្ធន័រវេសពិតជាអស្ចារ្យ លឿនដូចជាស្តេចរត់ប្រណាំង Usain Bolt អ៊ីចឹង។
ស្ថិតិវាស់ស្ទង់ពេលនោះ គឺចម្ងាយ ៦០ ម៉ែត្រ Haaland គេប្រើពេល ៦,៦៤ វិនាទី ហើយបើសួរថានេះលឿនជាងគេបង្អស់ក្នុងលោកឬអត់? ចម្លើយគឺ អត់ទេ ដោយធៀបនឹងកំណត់ត្រាបុគ្គលដែលធ្វើបានលឿនបំផុតនៅចម្ងាយ ៦០ ម៉ែត្រ នោះគឺអត្តពលិក Christian Coleman ជនជាតិអាមេរិក ដែលប្រើពេលត្រឹម ៦,៣៤ វិនាទីកាលពីខែកុម្ភៈ ឆ្នាំ ២០១៨។
ទស្សនាវីដេអូខាងក្រោម៖
https://twitter.com/i/status/1229863758408945672
យ៉ាងណាបើយើងក្រឡេកទៅការលេងនៅក្របខ័ណ្ឌ Bundesliga ឯណោះវិញ នៅរដូវកាលមុន ២០២០/២១ ក៏ Haaland បានបញ្ចេញសមត្ថភាពនៃការប្រើប្រាស់ល្បឿនរបស់គេមកដែរ ដោយរត់បានល្បឿន ៣៦,០៤ គ.ម/ម៉ លឿនជាងទាំង Thuram, Davies និង Coman ទៅទៀត៕
ប្រភព៖ GiveMeSport
អានអត្ថបទបន្ទាប់៖ Tottenham និង Arsenal កំពុងប្រជែងគ្នា លើការនាំយកស្រមោលមួយរូបនៅ Barcelona
កីឡាករដែលមិនបានលេងជាប់លាប់ ហើយត្រឹមជាតួរង នោះគេហៅថាជា “ស្រមោលនៃក្លឹប” ដោយជាទូទៅពួកគេក៏មិនអាចបន្តការឈរជើងយូរដែរ ហើយបើមានក្លឹបណាចង់បាន មើលឃើញថាសក្តិសម គេប្រាកដជាទៅ។
នៅអ្នកមានបុណ្យ Barcelona អ្នកចាំទីដៃទីពីរ Neto ក៏យើងរាប់ថា ជាស្រមោលម្នាក់ដែរ ព្រោះគេសឹងតែគ្មានឱកាសបានលេងតែម្តង ដោយរៀងរាល់ការប្រកួតគឺ Ter Stegen សឹងតែម៉ៅដាច់ ហើយប៉ុន្មានឆ្នាំមកនេះ កីឡាករប្រេស៊ីលបានត្រឹមតែអង្គុយទស្សនាការប្រកួត។
ស្របពេលដែលសុពលភាពកុងត្រារបស់គេនៅ Camp Nou ឈានមកដល់ឆ្នាំចុងក្រោយផង ក៏មានរបាយការណ៍ថា Neto គិតចង់ចាកចេញនៅរដូវក្តៅនេះហើយ ខណៈក្លឹបដែលចង់បានគេ មានក្លឹបធំ ២ នៅអង់គ្លេសមាន Tottenam Hotspur និង Arsenal ដែលកំពុងប្រជែងគ្នា។ នេះបើតាមរបាយការណ៍ពី Mundo Deportivo បានចុះផ្សាយ។
ប្រភពសង្កត់ធ្ងន់ថា Barcelona នឹងទាមទារតម្លៃខ្លួន Neto ប្រមាណ ១៤ លានអឺរ៉ូ ដែលនេះមិនជាថ្លៃពេកនោះទេ។ គួររំឭកថា Neto ត្រូវបាន Barcelona យកចេញពី Valencia នៅឆ្នាំ ២០១៩ ជាមួយតម្លៃ ២៦ លានអឺរ៉ូឯណោះ តែចាយពេលរយៈពេល ២ ឆ្នាំ គេលេចមុខឲ្យក្លឹបបាន ១៧ ប្រកួតគត់ ដោយរបូត ១៥ គ្រាប់និង Clean Sheet ៧ លើក៕
ប្រភព៖ BeSoccer
អានអត្ថបទបន្ទាប់៖ ឃើញនៅលេងល្អ Juventus ត្រៀមតកុងត្រាថែមឲ្យកីឡាករកាន់ឆ្នាំរបស់ខ្លួនម្នាក់ រយ:ពេលមួយឆ្នាំទៀត
ក្រុម Juventus ត្រូវគេរាយការណ៍ថាកំពុងត្រៀមចុះកុងត្រាលើកីឡាករ Giorgio Chiellini សារឡើងវិញ បន្ទាប់ពីខ្សែការពារជើងចាស់រូបនេះ បានក្លាយជាកីឡាករគ្មានតម្លៃខ្លួន ក្រោយផុតកិច្ចសន្យាជាមួយក្លិបនៅក្នុងខែនេះ ។
ជាក់ស្តែង Chiellini បានក្លាយជាផ្នែកដ៏សំខាន់សម្រាប់ក្រុម Juventus បន្ទាប់ពីបានចំណាយពេលអស់ ១៧ រដូវកាលនៅឯទីក្រុងទួរីន ប៉ុន្តែទោះជាយ៉ាងណាអនាគតបច្ចុប្បន្នរបស់លោក ហាក់ដូចជាមិនប្រាកដប្រជាទេ បន្ទាប់ពីកិច្ចសន្យាបច្ចុប្បន្នត្រូវអស់សុពលភាព កាលពីចុងខែមិថុនាកន្លងទៅ ។
តែទោះបីជាយ៉ាងណាក៏ដោយ យោងទៅតាមរបាយការណ៍ថ្មីមួយពី Calcio Mercato បានបង្ហាញឲ្យដឹងថាក្រុមយក្ស Serie A គ្រោងនឹងផ្តល់ជូន Chiellini នូវកិច្ចសន្យាថ្មីរយ:ពេលមួយឆ្នាំបន្ថែមទៀត ដើម្បីអាចឲ្យគេស្នាក់នៅជាមួយក្លិបបន្តទៀត ។
មិនតែប៉ុណ្ណោះ ខ្សែការពាររូបនេះក៏ត្រូវបានគេរាយការណ៍ផងដែរថានឹងត្រូវកាត់បន្ថយប្រាក់ឈ្នួលបន្តិចបន្តួច ដើម្បីអាចទទួលបានកិច្ចព្រមព្រៀងថ្មីនេះ ហើយវាក៏ត្រូវបានគេរំពឹងផងដែរថាក្លិបនឹងធ្វើការប្រកាសអំពីការចុះកិច្ចសន្យានេះ នៅក្នុងពេលឆាប់ៗខាងមុខ ៕
ប្រភព: Allfootball