Cristiano Ronaldo បានរកគ្រាប់បាល់ដំបូងគេនៅក្នុងការប្រកួតវគ្គចែកពូលក្របខណ្ឌ Champions League រដូវកាលឆ្នាំ ២០២១-២២ នេះ ទល់នឹងក្រុម Young Boys ស្របពេលវាក៏ក្លាយជាការស៊ុតបញ្ចូលទីទៅលើក្រុមទី ៣៦ ផ្សេងគ្នាផងដែរ សម្រាប់ខ្សែប្រយុទ្ធវ័យ ៣៦ ឆ្នាំរូបនេះ ដែលអាចតាមស្មើកំណត់ត្រាចាស់របស់ Lionel Messi ទៀតផង ។
មិនតែប៉ុណ្ណោះខ្សែប្រយុទ្ធសញ្ជាតិព័រទុយហ្កាល់ ក៏បានក្លាយជាកីឡាករដំបូងគេ ដែលរកគ្រាប់បាល់បើកឆាកក្នុងរដូវកាលពីផ្សេងគ្នានៅក្របខ័ណ្ឌ Champions League ផងដែរ ដោយលើកដំបូងជាមួយក្រុម Real Madrid ក្នុងអំឡុងជ័យជម្នះ ៥-២ ទល់នឹងក្រុម FC Zurich កាលពីរដូវកាល ២០០៩-១០ និងជាមួយក្រុម Manchester United នៅរដូវកាលនេះ ។
ជាក់ស្តែង Ronaldo បានវិលត្រឡប់មកកាន់ទឹកដី Old Trafford វិញ ពីក្រុមសេះបង្កង់ Juventus នៅរដូវក្តៅនេះ ស្របពេលលោកបានបង្កើតកំណត់ត្រាថ្មីមួយបន្ថែមទៀត នៅក្របខ័ណ្ឌ Champions League តាមរយ:ការបង្ហាញខ្លួនលើកទី ១៧៧ អំឡុងប្រកួតទល់ក្រុម Young Boys យប់មិញ ដែលនេះមានន័យថាលោកអាចតាមស្មើកំណត់ត្រារបស់អតីតមិត្តរួមក្រុម Real Madrid លោក Iker Casillas ផងដែរ ។
ក្រៅពីនេះ ម្ចាស់ពានរង្វាន់ Ballon d’Or ៥ សម័យកាលរូបនេះ ក៏ជាអ្នករកគ្រាប់បាល់បានច្រើនជាងគេនៅក្នុងប្រវត្តិសាស្ត្រ Champions League ផងដែរ ហើយឥឡូវនេះលោកមាន ១៥ គ្រាប់ នាំមុខពីលើ Messi ដែលឈរនៅចំណាត់ថ្នាក់លេខ ២ បន្ទាប់ពីការស៊ុតបញ្ចូលទីទៅលើក្រុម Young Boys នានាទីទី ១៣ ដោយធ្វើឲ្យគ្រាប់បាល់សរុបកើនឡើងដល់ ១៣៥ គ្រាប់ហើយ ៕
ប្រភព: Sportsmole
អានអត្ថបទបន្ទាប់៖ Ferdinand ថាក្រោយប្តូរចេញ Ronaldo មិនគប្បីបង្ហាញសកម្មភាពនេះទេយប់មិញ
ការប្រកួតរវាង Man Utd និង Young Boys កាលពីយប់មិញ បានបញ្ចប់ទៅក្រោមលទ្ធផល ២-១ ដែលម្ចាស់ផ្ទះនៅទឹកដីស្វីស បានឆ្លៀតឱកាសយកឈ្នះទៅលើក្រុមភ្ញៀវ ក្រោយការលេង ១០ ទល់ ១១ ជិត ៦០ នាទី។
Cristiano Ronaldo ក៏មិនបានលេងពេញម៉ោងដែរ ពោលត្រូវបានប្តូរចេញ និងជំនួសមកវិញនៅ Jesse Lingard ដោយលោក Ole Gunnar Solskjaer ចង់រៀបប្រព័ន្ធលេងឲ្យការពារ ដើម្បីទប់ទ.ល់នឹង Young Boys តែចុងក្រោយមិនបានសម្រេច។
កំឡុងពេលប្តូរចេញ Ronaldo មិនបានត្រលប់មកអង្គុយភ្លាមៗស្រួលបួលទេ តែលោកបែរជាមកឈរស្រែ.កណែនាំទៅកាន់មិត្តរួមក្រុមពីចម្ងាយ។ សម្រាប់អាកប្បកិរិយាបែបនេះ មតិខ្លះក៏ពេញចិត្ត តែសម្រាប់លោក Rio Ferdinand ជាអតីតមិត្តរួមក្រុមនៅបិសាចក្រហម បាននិយាយថា ជាសកម្មភាពដែលមិនគួរបង្ហាញចេញមក ពោលគួរតែទៅអង្គុយល្អជាង។
ប្រាប់ BT Sport លោក Ferdinand ថា៖ “បើខ្ញុំជាអ្នកចាត់ការពេលនោះវិញ ខ្ញុំនិយាយស្មោះត្រង់ទៅ ខ្ញុំនឹងប្រាប់ឲ្យ Ronaldo គេទៅអង្គុយចុះហើយ”។
ស្រដៀងនឹងការលើកឡើងរបស់ Peter Crouch បន្ត៖ “ប្រសិនខ្ញុំកំពុងអង្គុយនៅបម្រុង ខ្ញុំប្រាប់ឲ្យគេមកអង្គុយចុះហើយ តែនេះគេជា Cristiano អ៊ីចឹងឲ្យគេធ្វើចុះ”៕
ប្រភព៖ Metro