ដូចដែលប្រិយមិត្តបានដឹងស្រាប់ហើយ អនាគតរបស់ខ្សែប្រយុទ្ធ Robert Lewandowski ជាមួយក្រុម Bayern Munich ហាក់កំពុងស្ថិតនៅក្នុងភាពសង្ស័យនៅឡើយ ដោយសារតែកិច្ចសន្យាបច្ចុប្បន្នរបស់ខ្សែប្រយុទ្ធសញ្ជាតិប៉ូឡូញរូបនេះ នឹងត្រូវអស់សុពលភាព នៅឆ្នាំ ២០២៣ ខាងមុខនេះ ។
មិនតែប៉ុណ្ណោះ ជារឿយៗ Lewandowski ត្រូវបានភ្ចាប់ទំនាក់ទំនងយ៉ាងខ្លាំង ជាមួយនឹងការផ្ទេរទៅកាន់ក្លិបធំៗជាច្រើន រួមមាន Liverpool, Manchester City និង Real Madrid ប៉ុន្តែស្រាប់តែពេលថ្មីៗនេះ កីឡាករវ័យ ៣៣ ឆ្នាំ បានចេញមុខបញ្ជាក់ច្បាស់វិញ អំពីអនាគតរបស់ខ្លួន នៅក្នុងក្រុម Bayern Munich ។
ជាក់ស្តែង ដោយថ្លែងទៅកាន់បណ្តាញសារព័ត៌មាន ក្នុងអំឡុងពេលទទួលពានរង្វាន់ European Golden Shoe តារាឆ្នើមរូបនេះ បាននិយាយថា ៖ “ ខ្ញុំមិនចាំបាច់ត្រូវអភិវឌ្ឍខ្លួនខ្ញុំ នៅក្នុងលីគផ្សេងទៀតនោះទេ។ ខ្ញុំនៅតែអាចប្រកួតប្រជែងជាមួយក្លិបនៅតាមបណ្តាលីគដ៏ល្អបំផុត នៅក្នុងក្របខណ្ឌ Champions League ។ ខ្ញុំផ្តោត ១០០ ភាគរយជាមួយ Bayern Munich ខ្ញុំមិនគិតពីអ្វីផ្សេងក្រៅពីក្រុមរបស់ខ្ញុំនោះ ខ្ញុំនឹងនៅទីនេះ ហើយក៏នៅយូរទៀតផងដែរ! ” ។
គួរបញ្ជាក់ថា Lewandowski បានស៊ុតបាល់បញ្ចូលទីចំនួន ១១ គ្រាប់រួចមកហើយ ពីការបង្ហាញខ្លួន ៧ លើក នៅគ្រប់ការប្រកួតទាំងអស់នៅរដូវកាលនេះ ដែលនេះបានធ្វើឱ្យការស៊ុតបាល់បញ្ចូលទីសរុបរបស់គេកើនឡើងដល់ ៣០៥ គ្រាប់ ពីការចូលលេង ៣៣៦ ក្នុងនាមជាកីឡាករបស់ក្រុម Bayern ៕
ប្រភព: Sportsmole
អានអត្ថបទបន្ទាប់៖ ឃើញ Kante អាយុរាងជ្រេ កៀកផុតកុងត្រា ស្រាប់តែ Chelsea មើលឃើញអ្នកថ្មីរូបនេះភ្លែត
បច្ចុប្បន្នខ្សែបម្រើដែលគេឲ្យតម្លៃបំផុតនៅក្លឹបតោខៀវ Chelsea គឺអាចថា ជា N’Golo Kante ព្រោះគេជាកីឡាករកាន់ឆ្នាំនៅ Stamford Bridge និងជាចំណែកជួយក្លឹបទទួលបានជោគជ័យជាច្រើនលើកច្រើនសារ។
យ៉ាងណាទៅមើលកត្តាអាយុរបស់គេ គឺត្រៀមនឹងចូល ៣១ ឆ្នាំនៅពេលខាងមុខ ហើយសុពលភាពកុងត្រាក៏សេសសល់ត្រឹមចុងខែមិថុនា ឆ្នាំ ២០២៣ ទៀត។ ក្រោមការដឹកនាំរបស់លោក Thomas Tuchel គេជឿថា លោកនឹងគិតចង់យកអ្នកថ្មីមកជំនួសរយៈពេលយូរ ជាជាងបន្តប្រើប្រាស់កីឡាករបារាំង ទាំងដែលវ័យគេរាងជ្រេទៅហើយនោះ។
បើតាមសារព័ត៌មាន Football.london របស់អង់គ្លេសចុះផ្សាយថា ក្លឹបតោខៀវ Chelsea បានមើលឃើញកីឡាកររបស់ក្លឹប AC Milan នោះគឺ Franck Kessie ដែលគេសល់កុងត្រាជាមួយក្លឹបអាណាព្យាបាលនៅអ៊ីតាលី ត្រឹមបញ្ចប់រដូវកាលនេះប៉ុណ្ណោះ។
លឺថាការចរចារវាងកីឡាករកូឌីវ័រ និង លោក Paolo Maldini ជានាយកផ្នែកកីឡា មិនទាន់មើលឃើញសញ្ញាភ្លើងខៀវ ដែលជាហេតុនាំឲ្យ Chelsea ចង់ចូលចរចានៅលក្ខខណ្ឌឥតតម្លៃផ្ទេរនាពេលខាងមុខ។
បញ្ជាក់ថា Kessie ជាខ្សែបម្រើវ័យ ២៤ ឆ្នាំ ដែលគេក៏ស្ថិតក្នុងចចាមអារ៉ាម លឺថា Man Utd និង Liverpool តាមឃ្លាំមើលផងដែរ។ រដូវកាលចាស់ ៣៧ ប្រកួត គេរកបាន ១៣ គ្រាប់និង Assist ៦ លើករាប់ជាស្ថិតិល្អគួរសម៕
ប្រភព៖ Football.london