ក្រុមបាល់ទាត់ជម្រើសជាតិកម្ពុជា ទទួលបានជ័យជម្នះដោយលទ្ធផល ៤-២ ក្នុងការប្រកួតវគ្គជម្រុះ AFC U23 Asian Cup ទល់នឹងក្រុមជម្រើសហុងកុង ប៉ុន្ដែក្រុមដែលមានលោក Ryu Hirose ជាគ្រូបង្គោល ក៏រងការរិះគន់ផងដែរ ចំពោះការធ្វើឱ្យរបូតគ្រាប់បាល់ពីរគ្រាប់ នៅជិតចុងតង់ទី២។
ទោះយ៉ាងណាក្ដី លោក Hirose បាននិយាយថា ការរបូតគ្រាប់បាល់២គ្រាប់ នៅចុងតង់ទី២ ដោយសារក្រុមរបស់លោក មានការផ្លាស់ប្ដូរកីឡាករច្រើនរូប។ ប៉ុន្ដែការរបូតគ្រាប់បាល់ពីរគ្រាប់នេះ បានបង្ហាញពីគន្លឺះដើម្បីកែសម្រួល មុនការប្រកួតទល់នឹងជប៉ុននាថ្ងៃអង្គារខាងមុខនេះ។
“លទ្ធផលដែលយើងទទួលបានជ័យជម្នះ គឺព្រោះតែយើងព្យាយាមរក្សាបាល់ ដូចតាមអ្វីដែលយើងបានអនុវត្តក្នុងការហ្វឹកហាត់”។
ការរបូតពីរគ្រាប់នៅតង់ទី២ បណ្ដាលមកពីការផ្លាស់ប្ដូរកីឡាករច្រើន ព្រោះយើងចង់ដឹងពីការលេងរបស់កីឡាករថ្មីៗខ្លះ តែការផ្លាស់ប្ដូរនេះអាចឱ្យយើងដឹងថា យើងត្រូវតែសម្រួលបែបណា សម្រាប់ជំនួបជាមួយជប៉ុនរយៈពេល២ថ្ងៃខាងមុខទៀតនេះ”៕
ប្រភព៖ សហព័ន្ធកីឡាបាល់ទាត់កម្ពុជា