ក្លឹបអ្នកមានបុណ្យ Barcelona ត្រូវបានគេរាយការណ៍ថា កំពុងចាប់អារម្មណ៍ទៅលើកីឡាករនៃក្លឹប Man Utd ដែលពីមុនមិនអីទេ តែឥឡូវគេកំពុងដើរតួជាសំណព្វចិត្តក្នុងបេះដូងរបស់អ្នកចាត់ការថ្មី លោក Ralf Rangnick។
នោះគឺ Alex Telles ដែលក្លឹបអ្នកមានបុណ្យ សម្លឹងចង់បានគេ មកជំនួសកន្លែង Jordi Alba ក្រោយឃើញកត្តាអាយុរបស់កីឡាករអេស្ប៉ាញក៏កាន់តែជ្រេកៀកចូលវ័យ ៣៣ ឆ្នាំទៅហើយ។ មួយផ្សេងទៀតបញ្ហាកាយសម្បទារបស់ Alba ក៏មិនរឹងមាំដូចជាពេលមុនដែរ ដោយរមែងជួបបញ្ហារបួ.សញឹកញាប់រដូវកាលនេះ។
តាមសារព័ត៌មាន El Nacional ចុះផ្សាយថា ក្រុមដឹកនាំដោយលោក Xavi Hernandez បានចាប់អារម្មណ៍ទៅលើសមត្ថភាពរបស់ Telles តែមិនច្បាស់ថា យកបានឬអត់ទេ ព្រោះដូចបញ្ជាក់ពីខាងលើ ចូលដល់ជំនាន់ Rangnick មកដឹកនាំ គឺគេរមែងជាប់ជម្រើសដំបូងច្រើន។
បញ្ជាក់ដែរថា ខ្សែការពារស្លាប សញ្ជាតិប្រេស៊ីល សេសសល់សុពលភាពកុងត្រា ដល់ចុងខែមិថុនា ឆ្នាំ ២០២៤ ខណៈដែលហាងឆេងតម្លៃខ្លួន អាចថ្លៃល្បាក់ ២០ លានអឺរ៉ូ។ សរុបស្ថិតិជាមួយ United គេបង្ហាញខ្លួន ៣២ ប្រកួត រកបាន ១ គ្រាប់និង Assist ៤ លើក ចាប់តាំងការផ្ទេរ ពីក្លឹប FC Porto៕
ប្រភព៖ El Nacional
អានអត្ថបទបន្ទាប់៖ Zlatan មិនងាយសរសើរនរណាទេ តែចំពោះយុវជន ២ រូបនេះ គេឲ្យតម្លៃខ្ពស់បំផុត
Zlatan Ibrahimovic ដូចអ្នកបានដឹងស្រាប់ហើយ លោកមិនងាយចេះសរសើរកីឡាករណានោះទេ ផ្ទុយទៅវិញមានតែបង្អា.ប់ ឬលើកថាខ្លួនឯងល្អជាងនរណាទាំងអស់។ ចម្លែកអីងាកមកអត្ថបទនេះ កីឡាករស៊ុយអែត បែរជាសរសើរមិនដាច់ពីមាត់ដល់យុវជនឆ្នើម ២ រូប ដែលខ្លួនគោរពឲ្យតម្លៃខ្ពស់បំផុតក្នុងកីឡាបាល់ទាត់។
នៅបទសម្ភាសន៍ជាមួយ CBS Sports ខ្សែប្រយុទ្ធនៃក្លឹប AC Milan បានសរសើរដល់ Kylian Mbappe និង Erling Haaland។ Zlatan និយាយ៖ “នៅពេលអ្នកជាកីឡាករបាល់ទាត់ម្នាក់ អ្នកអាចមើលទៅកីឡាករដទៃ របៀបនៃការគិត ការបម្លាស់ទីរបស់ពួកគេ ជាពិសេសខ្ញុំចូលចិត្តការទស្សន៍ទាយដឹងជាមុន នៃកីឡាករលើទីលាន ហើយខ្ញុំគិតថា Mbappe គេជាកីឡាករល្អម្នាក់ ធ្វើឲ្យខ្ញុំនឹកដល់ Ronaldo ប្រេស៊ីល គេឈ្លាសវៃណាស់ក្នុងការប្រកួត”។
លោកបន្ត៖ “ពេលនិយាយដល់កីឡាករវ័យក្មេងនេះសោត យើងក៏និយាយដល់ឈ្មោះ Haaland គេល្អដូចគ្នា គេស្រេក.ឃ្លានការរកគ្រាប់បាល់ និយាយទៅគេផ្តោតលើការរកគ្រាប់បាល់ឲ្យបានគ្រប់ការប្រកួត ហើយខ្ញុំមើលឃើញភាពឈ្លាសវៃរបស់គេ គឺត្រង់សមត្ថភាពនៃការបញ្ចប់ទីហ្នឹងឯង”។
គួរបញ្ជាក់ថា ក្នុងអាជីពរបស់កីឡាករបារាំង Mbappe មកទល់ពេលនេះ ស្ថិតនៅវ័យ ២២ ឆ្នាំ គេបង្ហាញខ្លួនសរុប ១៩៤ ប្រកួត រកបាន ១៤៥ គ្រាប់និង Assist ៧៥ លើក។ ស្របពេលដែល Haaland ស្ថិតនៅវ័យ ២១ ឆ្នាំ បង្ហាញខ្លួន ៧៤ ប្រកួត រកបាន ៧៦ គ្រាប់និង Assist ២០ លើក៕
ប្រភព៖ SportBible