កិច្ចសន្យារបស់ខ្សែប្រយុទ្ធ Luis Suarez ជាមួយក្រុម Atletico Madrid នឹងមិនសល់ពេលយូរទៀតនោះទេ ពោលគឺត្រូវផុតសុពលភាព នៅចុងបញ្ចប់រដូវកាលនេះហើយ ខណ:មានក្លិបធំៗជាច្រើន ក៏ធ្លាប់បានទាក់ទងមកកាន់ខ្សែប្រយុទ្ធរូបនេះ រួចហើយផងដែរ ។
ជាក់ស្តែង ខ្សែប្រយុទ្ធសញ្ជាតិអ៊ុយរូហ្គាយរូបនេះ នឹងក្លាយទៅជាកីឡាករដែលគ្មានតម្លៃខ្លួន នៅពេលទីផ្សារដោះដូររដូវក្តៅមកដល់ ហើយរូបគេក៏កំពុងគិតគូជុំវិញកន្លែងលេងផ្សេងទៀត នៅពេលត្រូវចាកចេញពីទឹកដី Wanda Metropolitano ។
ហើយយ៉ាងណា យោងតាមសារព័ត៌មានអ៊ីតាលី Corriere dello Sport បានឱ្យដឹងថាក្លិបសេះបង្កង់ Juventus ធ្លាប់បានទាក់ទងទៅកាន់ Suarez ដើម្បីបញ្ចុះបញ្ចូលរូបគេឲ្យផ្ទេរមកកាន់ក្របខ័ណ្ឌ Serie A ប៉ុន្តែត្រូវបានបដិសេធដោយសមីខ្លួនភ្លាមៗតែម្តង ។
មិនតែប៉ុណ្ណោះ របាយការណ៍ដដែល បានបន្តអះអាងទៀតថា Juventus កំពុងតែព្យាយាមស្វែងរក អ្នកមកជំនួសតំណែងរបស់កីឡាករ Alvaro Morata ដែលនឹងត្រូវវិលត្រលប់ទៅកាន់ប្រទេសអេស្ប៉ាញវិញ នៅលក្ខខណ្ឌខ្ចីជើង ក្នុងទីក្រុង Turin ឈានដល់ទីបញ្ចប់ ។
ហើយសម្រាប់ Suarez វាមិនមែនជាលើកទីមួយទេ ដែលរូបគេត្រូវបានភ្ចាប់ទំនាក់ទំនងជាមួយនឹងការផ្ទេរទៅកាន់កីឡដ្ឋាន Allianz ដោយកាលឆ្នាំ ២០២០ កិច្ចព្រមព្រៀងមួយស្ទើតែបានកើតឡើងទៅហើយ ប៉ុន្តែត្រូវបរាជ័យវិញ ដោយសារបញ្ហាចម្រូងចម្រាស់ ទៅលើការផ្លាស់ប្តូរសញ្ជាតិ ៕
ប្រភព: AF
អានអត្ថបទបន្ទាប់៖ [ផ្លូវការ] បើកទំព័រខែមករា ក្លឹប Man Utd ប្រកាសពីការចាកចេញរបស់កីឡាករ ២ រូប
ទីផ្សារដោះដូរខែមករា ទើបតែបើកទ្វារបានប៉ុន្មានថ្ងៃ មកមើលក្លឹបអង់គ្លេស Man Utd ក៏ចាប់ផ្តើមសកម្មជាបណ្តើរៗហើយ ពាក់ព័ន្ធនឹងការផ្ទេរចេញកីឡាករ ហើយឥឡូវមាន ២ រូបហើយដែលក្លឹបប្រកាសកាលពីពេលថ្មីៗនេះ។
ទី ១) គឺខ្សែការពារស្លាបស្តាំ វ័យ ២០ ឆ្នាំ កីឡាករ Ethan Laird ដែលគេជាយុវជនលេងឲ្យ Man Utd U23 ហើយត្រូវបានក្លឹប Bournemouth ខ្ចីជើងយកទៅចូលរួម ដល់បញ្ចប់រដូវកាល ២០២១/២២។ ទី ២) គឺខ្សែការពារកណ្តាល Teden Mengi ដែលគេក៏ជាយុវជននៅ U23 ដូចគ្នា ហើយត្រូវបានក្លឹប Birmingham ខ្ចីជើង ក្នុងរយៈពេល ៦ ខែដូចជា Ethan អ៊ីចឹងដែរ។
ការចាកចេញ ទំនងជាមិនទាន់បញ្ចប់ទេ សម្រាប់ក្លឹបម្ចាស់ដី Old Trafford សារនេះ ដោយទំនងជាមានច្រើនបន្ថែមទៀត ព្រោះអីយើងលឺថា អាចជាមាន Anthony Martial, Donny van de Beek, Juan Mata និងកីឡាករមួយចំនួនផ្សេងទៀតជាដើម អាចផ្ទេរចេញនៅខែមករាផ្ទាល់តែម្តង ក្រោមហេតុផលខ្លះមិនសូវបានពេលវេលាចូលលេង ខ្លះមិនពេញចិត្តនឹងការដឹកនាំរបស់អ្នកចាត់ការថ្មី លោក Ralf Rangnick។
ជាមួយការនាំយកកីឡាករឯណោះ សម្រាប់កីឡាករដែលមានតម្លៃថ្លៃ យើងមិនទាន់លឺច្បាស់ត្រចៀកនោះទេ ថា United អាចនឹងយកនរណា ពោលខែមករា ទំនងជាផ្អា.កការចាយលុយធំ ហើយបើចាយ ក៏ទំនងជាពង្រឹងបន្ថែមនៅតំបន់ប្រយុទ្ធ ឬបម្រើ រីឯការពារ មិនទាន់សម្លឹងឃើញនរណាច្បាស់ការឡើយ៕
ប្រភព៖ Twitter