ក្លឹប Man Utd និងក្លឹបនៅអេស្ប៉ាញ បានឈានដល់កិច្ចព្រមព្រៀង ក្នុងការដាក់ឲ្យខ្ចីជើងកីឡាករ Anthony Martial សម្រាប់ទីផ្សារដោះដូរខែមករានេះហើយ។ នេះបើតាមការបញ្ជាក់ច្បាស់ៗពីអ្នកវិភាគលើទីផ្សារដោះដូរគួរឲ្យទុកចិត្ត លោក Fabrizio Romano។
ជាការពិត អនាគតកីឡាករសញ្ជាតិបារាំង បានក្លាយជាមន្ទិលសង្ស័.យរបស់អ្នកគាំទ្រ បន្ទាប់ពីគេចាប់មានទំនា.ស់ពាក្យសម្តីជាមួយអ្នកចាត់ការលោក Ralf Rangnick។ គួបផ្សំនឹងគេមិនសូវបានលេងជាប់លាប់ផង ដូច្នេះការចាកចេញពេលនេះ គឺជាជម្រើសដ៏សមស្រប។
ប្រភពបានឲ្យដឹងថា អតីតកីឡាករនៃក្លឹប Lyon បានព្រមការផ្ទេរទៅកាន់ក្លឹប Sevilla ដោយការប្រកាសផ្លូវការនឹងធ្វើឡើងនៅប៉ុន្មានម៉ោងបន្ទាប់។ យ៉ាងណាការផ្ទេរខាងលើ ស្ថិតនៅលក្ខខណ្ឌខ្ចីជើងប៉ុណ្ណោះ ហើយភាគីខាង Sevilla ព្រមសម្រេចជួយចេញថ្លៃពលកម្មជំនួសក្លឹបអាណាព្យាបាល Man Utd។
តែយ៉ាងណាមិនច្បាស់ថា កិច្ចព្រមព្រៀងសារនេះ មានលក្ខខណ្ឌទិញផ្តាច់កុងត្រាឬអត់ទេ គ្រាន់ត្រឹមដឹងថា United ក៏នឹងទទួលបានលុយចន្លោះ ៤ ទៅ ៥ លានផោន ត្រឹមកំឡុងពេលខ្ចីជើងដល់ចុងខែមិថុនាខាងមុខ។ បញ្ជាក់ស្ថិតិរដូវកាល ២០២១/២២ សម្រាប់ខ្សែប្រយុទ្ធវ័យ ២៦ ឆ្នាំ បង្ហាញខ្លួនឲ្យ United តែ ១១ ប្រកួត រកបានតែ ១ គ្រាប់ប៉ុណ្ណោះ៕
ប្រភព៖ Twitter
អានអត្ថបទបន្ទាប់៖ Rio ថា Newcastle នឹងជៀសផុតពីតំបន់ត្រូវកាត់ឈ្មោះ ហើយក្លឹប ៣ នេះនឹងធ្លាក់ចេញពី PL
ការប្រកួតនៅក្របខ័ណ្ឌ Premier Leage បានឈានមកដល់ ៦០ ភាគរយហើយនៃរដូវកាលទាំងមូល ដោយយើងក៏បានរកឃើញតម្រុយជាបណ្តើរៗ អំពីក្លឹបដែលនឹងអាចលើកពាន ក្លឹបឈរ Top 4 ក៏ដូចជាក្លឹប ៣ ដែលអាចនឹងកាត់ឈ្មោះចេញពីលីគលំដាប់ ១ ហើយធ្លាក់ទៅលីគលំដាប់ ២ របស់អង់គ្លេស។
បច្ចុប្បន្នក្លឹប Newcastle ឈរលេខ ១៨ មាន ១៥ ពិន្ទុ (គិតត្រឹមជុំទី ២១), Watford ឈរលេខ ១៩ មាន ១៤ ពិន្ទុ (គិតត្រឹមជុំទី ២០) និង Burnley ឈរបាតតារាង មាន ១២ ពិន្ទុ (គិតត្រឹមជុំទី ១៨)។ តែយ៉ាងណាតាមការយល់ឃើញរបស់ Rio Ferdinand ជាអ្នកវិភាគលើប៉ុស្តិ៍កម្មវិធីបាល់ទាត់មួយ ក៏លើកឡើងថា ក្លឹបដែលនឹងធ្លាក់នៅបញ្ចប់រដូវកាល គឺ Burnley, Watford និង Norwich City ឯណោះ ហើយ Newcastle នឹងនៅតែមានសង្ឃឹមអាចបន្ត។
ក៏ដោយសារតែនៅខែមករា សម្រាប់ទីផ្សារដោះដូររដូវរងា លោកជឿជាក់ថា Newcastle នឹងបញ្ចប់ការដោះដូរកីឡាករចំណូលថ្មីជាច្រើន ពោលអាចនាំយកពួកគេមកពង្រឹងក្រុម ឲ្យទទួលបានលទ្ធផលល្អប្រសើរជាងនេះឆ្ងាយ។
ជាការពិត បើយើងទៅមើលកីឡាករនៃក្រុមលោក Eddie Howe សម្រេចយកបានគឺរួមមាន Kieran Trippier ជាខ្សែការពារឆ្នើម ហើយក៏លឺថា នឹងត្រៀមយកបាន ២ ទៅ ៣ រូបផ្សេងទៀតនៅតំបន់បម្រើ និងប្រយុទ្ធផងដែរ។ រំឭកថាលើកចុងក្រោយដែល Newcastle ធ្លាក់ចេញពី PL គឺនៅរដូវកាល ២០១៥/១៦ ហើយរដូវកាលបន្ទាប់ ពួកគេបានក្លាយជាម្ចាស់ជើងឯកលីគលំដាប់ទី ២៕
ប្រភព៖ Metro