យោងតាមប្រភពពីសារព័ត៌មាន VN Express បានចុះផ្សាយថា សហព័ន្ធកីឡាបាល់ទាត់វៀតណាម (VFF) បានសូមការអនុញ្ញាត ពីសហព័ន្ធកីឡាបាល់ទាត់អាស៊ាន(AFF) ដើម្បីបញ្ជូនកីឡាករបន្ថែមក្នុងក្រុមយុវជន ក្រោមអាយុ២៣ឆ្នាំ ត្រៀមប្រកួតផ្ដាច់ព្រ័ត្រ AFF U23 Youth Championship ទល់នឹងក្រុមជម្រើសជាតិថៃ។
វៀតណាមនៅសល់តែកីឡាករ១៣នាក់ប៉ុណ្ណោះ ដែលអាចចូលរួមការប្រកួតវគ្គពាក់កណ្ដាលផ្ដាច់ព្រ័ត្រទល់នឹងទីម័រ កាលពីថ្ងៃព្រហស្បតិ៍ ហើយក្នុងការប្រកួតនោះ គ្រូបង្គោល Dinh The Nam បានដាក់អ្នកចាំទី Tran Liem Dieu ឱ្យលេងជាខ្សែប្រយុទ្ធ នៅម៉ោងបន្ថែម ដោយសារការខ្វះខាតកីឡាករ។
ក្រៅពីមានកីឡាករពីររូបមិនអាចលេងបានដោយសាររបួស ក្រុម U23 វៀតណាម មានការឆ្លងកូវីដ១៩ មួយករណីអំឡុងពេលធ្វើតេស្ដកាលពីថ្ងៃសុក្រ។ ហើយពេលនេះ ពួកគេនៅសល់តែកីឡាករ១០នាក់ប៉ុណ្ណោះ ដើម្បីត្រៀមខ្លួនសម្រាប់ការប្រកួតទល់នឹងថៃ នាថ្ងៃសៅរ៍នេះ។
ក្នុងចំណោមកីឡាករទាំង២៧រូបដែលត្រូវបានកោះហៅចូលរួមការប្រកួត ពានរង្វាន់ទ្វីបអាស៊ានក្រោម២៣ឆ្នាំ មានកីឡាករវៀតណាម២៤រូបទៅហើយ ដែលបានឆ្លងកូវីដហើយ ពួកគេត្រូវការកោះហៅកីឡាករបន្ថែមដើម្បីមកជួយក្រុម។
AFF កំពុងពិចារណាចំពោះសំណើរបស់វៀតណាម ហើយការសម្រេចនឹងធ្វើឡើង បន្ទាប់ពីការធ្វើ PCR តេស្ដ ក្នុងក្រុមទាំងមូល ដើម្បីអាចដឹងថា មានកីឡាករប៉ុន្មាននាក់ ដែលអាចប្រកួតបាន៕
អានអត្ថបទបន្ទាប់៖ មិនទៅ Man Utd ទេ Pochettino ចង់ជ្រើសយកសំណើក្លឹបមួយ ដែលបោះចោលកាល ៤ ឆ្នាំមុន
អ្នកចាត់ការលោក Mauricio Pochettino នឹងគ្មានបំណងចង់ទៅដឹកនាំក្លឹប Manchester United នៅក្រោយបញ្ចប់រដូវកាលនេះទេ ផ្ទុយទៅវិញ គឺចាប់អារម្មណ៍ចង់ទៅកាន់កាប់ក្លឹប ដែលធ្លាប់ផ្តល់សំណើឲ្យខ្លួនកាលពីឆ្នាំ ២០១៨ ហើយត្រូវបានសាមីខ្លួនលោកផ្ទាល់បដិសេធ។
នោះគឺបន្ទាប់ដើរចេញពី PSG គ្រូសញ្ជាតិអាហ្សង់ទីន ចង់ទៅដឹកនាំក្លឹបយក្សអេស្ប៉ាញ Real Madrid បន្តពីលោក Carlo Ancelotti។ ដ្បិតបើកំពុងដឹកនាំក្រុមនាំមុខកំពូលតារាង La Liga តែអនាគតរបស់គ្រូសញ្ជាតិអ៊ីតាលី ហាក់មិននឹងនឡើយ ជាពិសេសប្រសិនត្រូវធ្លាក់ត្រឹមវគ្គ ១៦ ក្រុម UCL។
បើតាមសារព័ត៌មាន Sport ចុះផ្សាយថា Pochettino ចាប់អារម្មណ៍ចង់ផ្ទេរទៅក្លឹបក្នុងទីក្រុង Madrid នៅរដូវក្តៅខាងមុខ ព្រោះអីលោកហាក់មានការសោក.ស្តាយដែលកាលពីឆ្នាំ ២០១៨ ទទួលបានឱកាសដែរ តែលោកបដិសេធ ដោយគិតថាត្រៀមខ្លួនមិនទាន់រួចរាល់។
រំឭកថាបុរសវ័យ ៤៩ ឆ្នាំ សេសសល់សុពលភាពកុងត្រាដល់ចុងខែមិថុនា ឆ្នាំ ២០២៣ ហើយអតីតកាលបទពិសោធន៍ដឹកនាំក្លឹបនៅក្របខ័ណ្ឌ La Liga គឺមានតែ Espanyol មួយគត់។ សរុបស្ថិតិជាអ្នកចាត់ការ ដឹកនាំ ៥៨៤ ប្រកួត ឈ្នះ ២៨៤ ស្មើ ១២៦ និងចាញ់ ១៧៤ លើក៕
ប្រភព៖ Sport