រដូវកាលនៅ La Liga សម្រាប់ក្លឹប Real Madrid បានឈានដល់ទីបញ្ចប់ហើយ ដោយលទ្ធផលជុំទី ៣៨ ពួកគេបានលេងស្មើ ០-០ ទល់ក្លឹប Real Betis។ ដោយឡែកក្នុងចំណោមកីឡាករបង្ហាញខ្លួនលើទីលានយប់មិញ ក៏មានម្នាក់ដែលកំណត់ក្លាយជាប្រកួតចុងក្រោយសម្រាប់គេផងដែរ។
នោះគឺខ្សែបម្រើ Isco ដែលត្រូវបានអ្នកចាត់ការលោក Carlo Ancelotti សម្រេចប្តូរចូលនៅនាទី ៧០ ជំនួសខ្សែប្រយុទ្ធ Rodrygo។ ពេលវេលាលើទីលានរយៈពេល ២០ នាទីសម្រាប់កីឡាករអេស្ប៉ាញ គឺពិតជាមានន័យ ព្រោះវាជាពេលវេលានៃប្រកួតចុងក្រោយ ដែលគ្រោងឈុតសរបស់ក្លឹប Real Madrid។
តាមការបញ្ជាក់ពីអ្នកចាត់ការសញ្ជាតិអ៊ីតាលី និយាយ៖ “អាជីពរបស់ Isco ជាមួយក្លឹប Real Madrid គឺឈានមកដល់ទីបញ្ចប់ហើយនៅថ្ងៃនេះ វាគឺពិតជាអាជីពដ៏ល្អមួយ”។ គេមិនទាន់ច្បាស់ថា ក្លឹបនឹងសម្រេចនាំចូលអ្នកថ្មីឬអត់ទេ ជុំវិញការមកបំពេញកន្លែងដែលចន្លោះ នារដូវកាលបន្ទាប់។
រំឭកឲ្យដឹងបន្តិច Isco បានផ្លាស់ចេញពីក្លឹប Malaga មកកាន់ក្លឹប Real Madrid នៅឆ្នាំ ២០១៣ ហើយសរុបពេលនោះ បង្ហាញខ្លួនក្នុងលីគ ២៤៦ ប្រកួត រកបាន ៣៧ គ្រាប់។ គេក៏បានលើកពានរង្វាន់ជាច្រើនផងដែរ មិនថាតែ La Liga, UEFA Champions League និងពានក្នុងស្រុកមួយចំនួនផ្សេងទៀត៕
ប្រភព៖ Goal