អ្នកចាត់ការលោក Pep Guardiola នៃក្លឹបមេឃខៀវ Manchester City បានទម្លាយកាលពីពេលថ្មីៗ ថាពេលទៅមុខ ចង់ឃើញកីឡាករលេងតំណែងបម្រើ បន្តឈរជើងនៅក្លឹបដដែល។ នេះជាការឆ្លើយតប ក្រោយលឺចចាមអារ៉ាមចង់ចាកចេញ ដែលថែមទាំងមានប្រភពមួយនោះ ថាគ្រូបានប្រាប់ទៅសិស្ស ឲ្យលៃលករកក្លឹបថ្មីទៀតផង។
នោះគឺអនាគតរបស់ Ilkay Gundongan ដែលគេមិនសូវមានឱកាសគ្រប់គ្រាន់ទេ ពោលមិនមែនជាតួឯក ដូចជា Kevin de Bruyne ឬ Bernardo Silva ជាដើមឡើយ។ រយៈពេលចុងក្រោយ ឈ្មោះកីឡាករអាល្លឺម៉ង់ បានផ្សារភ្ជាប់ទៅកាន់ក្លឹបអេស្ប៉ាញ Barcleona និងក្លឹបរួមលីគ Arsenal។
តែយ៉ាងណាតាមការបញ្ជាក់របស់គ្រូអេស្ប៉ាញថ្មីៗនេះ៖ “ប្រសិនអ្នកសួរនាំខ្ញុំផ្ទាល់ ខ្ញុំហ៊ាននិយាយថា ចង់ឲ្យ Gundogan បន្តនៅរដូវកាលបន្ទាប់ គ្មាននរណាគិតថា គេនឹងមិនអាចនៅ City ឡើយ ដោយរឿងគេចង់ចាកចេញ ក្លឹបអត់បានដឹងលឺអីទាំងអស់ នេះមានតែគណនី Twitter ទាំងអស់ហ្នឹងទេដែលចុះផ្សាយ អ៊ីចឹងខ្ញុំអត់ដឹងទេ ឬប្រហែលពួកគេដឹងច្រើនជាងខ្ញុំទៀតមើលទៅ”។
រំឭកឲ្យដឹងថា Gundogan ជាកីឡាករដែលបានមកចូលរួម នៅ City កាលពីឆ្នាំ ២០១៦ ហើយសុពលភាពកុងត្រាសព្វថ្ងៃសេសសល់ដល់ចុងខែមិថុនា ឆ្នាំ ២០២៣។ ស្ថិតិរដូវកាលនេះ គេលេងបាន ៤២ ប្រកួត រកបាន ៨ គ្រាប់និង Assist ៦ លើក តែភាគច្រើនត្រឹមឈរជើងនាមកីឡាករបម្រុង៕
ប្រភព៖ Sportsmole