Erling Haaland បានសម្រេចហើយ ថានឹងចាកចេញពីក្លឹប Borussia Dortmund ផ្លាស់ទៅក្លឹបថ្មី Manchester City ចាប់ពីថ្ងៃទី ១ កក្កដា ឆ្នាំ ២០២២ តទៅ។ កីឡាករសញ្ជាតិន័រវេស មុនការចាកចេញ គេក៏បានចែកកាដូ ទៅដល់អ្នកចាត់ការ និងបណ្តាកីឡាករទាំងអស់ ជាការលាគ្នាផងដែរ។
Haaland បានចែកនាឡិកាចំនួន ៥៣ គ្រឿង ដោយ ៣៣ គ្រឿងដល់កីឡាករនិងអ្នកចាត់ការ ហើយ ២០ គ្រឿងដល់បុគ្គលិករួមក្លឹប Dortmund។ សម្រាប់មិត្តរួមក្រុមនិងអ្នកចាត់ការ ទទួលបាននាឡិកាយីហោ Rolex តម្លៃចន្លោះ ១១ ០០០ ទៅ ១៣ ០០០ ផោន/គ្រឿង។ រីឯសម្រាប់បណ្តាបុគ្គលិកនៅក្លឹប ជានាឡិកាយីហោ Rolex មានតម្លៃចន្លោះពី ៦ ០០០ ទៅ ៨ ០០០ ផោន/គ្រឿង។ នេះបើតាមសារព័ត៌មាន Bild បានចុះផ្សាយ។
សរុបជារួម គឺ Haaland ចាយអស់ប្រហែលនឹងថ្លៃពលកម្មមួយសប្តាហ៍នៅក្លឹប Man City គឺប្រហែលជិត ៤០០ ០០០ ផោន/សប្តាហ៍។ រំឭកថា ពេលវេលានៅ Dortmund គេរកបាន ៨៦ គ្រាប់ នៅ ៨៩ ប្រកួត ជាស្ថិតិដ៏អស្ចារ្យមួយ នាមយុវជនវ័យស្រករទើបតែ ២០ ឆ្នាំស្តើង។
ងាកទៅក្លឹបមេឃខៀវ Man City ពួកគេត្រូវបញ្ចប់យុទ្ធនាការនៅ PL ត្រឹមយប់ស្អែកម៉ោង ១០:០០ នាទីមានផ្សាយផ្ទាល់លើទំព័រ CTS Sports ជាប្រកួតទល់ Aston Villa។ បើលទ្ធផល ឈ្នះ នោះនឹងសម្រេចឲ្យក្រុមលោក Pep Guardiola ក្លាយជាម្ចាស់ពាន Premier League ជាផ្លូវការ នៅរដូវកាល ២០២១/២២។ ប្រកួតដែល Haaland អាចនឹងបង្ហាញខ្លួនដំបូងឲ្យមេឃខៀវ គឺទំនងជាការប៉ះ Club America នៅថ្ងៃទី ២១ កក្កដា ជាជំនួបមិត្តភាព៕
ប្រភព៖ Bild