យោងតាមរបាយការណ៍ចុងក្រោយមួយ បានបង្ហាញឱ្យដឹងថា គ្រូបង្វឹក របស់ក្រុម Tottenham Hotspur លោក Antonio Conte បានបញ្ជាក់យ៉ាងច្បាស់ជុំវិញ អនាគតរបស់លោក ជាមួយក្លិបអង់គ្លេស នៅរដូវកាលក្រោយ ចំពេលមានពាក្យចចាមអារ៉ាមជាច្រើន លើការចាកចេញពីក្លិប ។
ជាក់ស្តែង បុរសវ័យ ៥២ ឆ្នាំរូបនេះ បានដឹកនាំក្រុម Spurs ឱ្យទទួលបានកៅអីលេងនៅក្របខ័ណ្ឌ Champions League វិញ នៅរដូវកាក្រោយ បន្ទាប់ពីបញ្ចប់ទៅដោយចំណាត់ថ្នាក់លេខ ៤ ក្នុងក្របខ័ណ្ឌ Premier League ។
តែទោះបីជាមានជោគជ័យនោះក៏ដោយ វានៅតែមានការរំពឹងទុកជាច្រើន ជុំវិញអនាគតរបស់គ្រូបង្វឹកសញ្ជាតិអ៊ីតាលី នៅក្នុងក្រុម Spurs ដោយគេយល់ថា លោក Conte ចង់ទទួលបានការជ្រួយជ្រោមជ្រែងបន្ថែមទៀតពីថ្នាក់ដឹកនាំរបស់ក្លិប នៅក្នុងទីផ្សារដោះដូរកីឡាកររដូវក្តៅខាងមុខ ។
ហើយឥឡូវនេះ បើយោងតាមរបាយការណ៍ពី Sky Sports បានបង្ហាញថាលោក Conte បានសម្រេចចិត្តថានឹងបន្តស្នាក់នៅក្លិប សម្រាប់រដូវកាលក្រោយទៀត បន្ទាប់ពីបានពិភាក្សាជាមួយនាយកផ្នែកបាល់ទាត់ លោក Fabio Paratici កាលពីថ្ងៃសុក្រ។
មិនតែប៉ុណ្ណោះ លោក Paratici ត្រូវបានគេយល់ថា បានផ្តល់ការធានាដល់ លោក Conte ថាយ៉ាងហោចណាស់កីឡាករ ៦ ឬ ៧ នាក់ នឹងត្រូវបានចុះហត្ថលេខាក្នុងទីផ្សារដោះដូរកីឡាករខាងមុខនេះ ដើម្បីពង្រឹងក្រុមបន្ថែមទៀត ៕
ប្រភព: Sportsmole