អ្នកចាត់ការ Real Madrid និងកូនក្រុម កំពុងមានភាពមមាញឹកក្នុងការត្រៀមខ្លួនសម្រាប់ការប្រកួត UEFA Champions League វគ្គផ្ដាច់ព្រ័ត្រទល់នឹង Liverpool នារាត្រីថ្ងៃសៅរ៍នេះ។
ក្រុមអធិរាជស បានធ្វើដំណើរទៅដល់កីឡដ្ឋាន Stade de France ក្នុងទីក្រុងប៉ារីស ប្រទេសបារាំង ដោយរំពឹងថា អាចឈ្នះពានទី២ ក្រោមការត្រលប់មកដឹកនាំរបស់លោក Ancelotti នៅរដូវកាលនេះ។
លោក Ancelotti បានឈ្នះជើងឯក La Liga ជាលើកដំបូងរបស់ខ្លួនក្នុងនាមជាអ្នកចាត់ការក្លិប កាលពីខែមុន ហើយលោកមានក្ដីរំពឹងថា អាចឈ្នះជើងឯក Champions League លើកទី៤ក្នុងនាមជាអ្នកចាត់ការក្លិបផងដែរ។
ប៉ុន្ដែបុរសជនជាតិអ៊ីតាលីរូបនេះ បានសូមការគាំទ្រពីអ្នកគាំទ្ររបស់ Everton សម្រាប់ការប្រកួតនេះ។
ការគោរពពីអ្នកគាំទ្រ Everton មករូបលោកពិតជាមិនអាចកាត់ថ្លៃបាននោះទេ បើទោះបីជាលោកបានចាកចេញពីក្លិបនេះ ដោយមិនត្រូវបានរំពឹងទុក កាលពីរដូវក្ដៅកន្លងទៅក៏ដោយ។
លោក Ancelotti បាននិយាយកាលពីម្សិលមិញថា៖ “អ្នកគាំទ្រ Everton ប្រាកដជានឹងគាំទ្រយើងនៅថ្ងៃស្អែក។ មានការប្រជែងគ្នាដ៏អស្ចារ្យជាមួយ Liverpool ហើយខ្ញុំមានការចងចាំដ៏ល្អ សម្រាប់ពេលវេលារបស់ខ្ញុំនៅទីនោះ សម្រាប់ក្រុមពណ៌ខៀវក្នុងទីក្រុង”៕
ប្រភព៖ Football Espana