ក្លឹបបិសាចក្រហម Manchester United បានបរាជ័យនៅការនាំយក Frenkie de Jong បន្ទាប់ពីកីឡាករប្រកាសកាលពីយប់មិញ ថានឹងបន្តនៅក្លឹបក្នុងក្តីស្រមៃគឺ Barcelona តទៅទៀត។ នេះបើតាមការបញ្ជាក់ ក្រោយកើតមានចចាមអារ៉ាមថាកីឡាករហូឡង់ គិតចង់ផ្លាស់ទៅរួបរួមជាមួយអ្នកចាត់ការរួមសញ្ជាតិលោក Erik ten Hag។
បើតាមសារព័ត៌មាន Manchester Evening News បានចុះផ្សាយ សម្រាប់ De Jong ការផ្ទេរដែលមិនអាចកើតឡើងទៅបានសារនេះ គឺដោយសារតែ Man Utd មិនអាចបំពេញនៅបំណងប្រាថ្នា នោះគឺការលេងនៅពានអឺរ៉ុប UEFA Champions League។ ចំពោះតម្លៃផ្ទេរ ៧៥ លានផោន មិនជាបញ្ហារបស់ក្លឹបទេ តែសំខាន់ត្រង់កីឡាករចង់លេងពានអឺរ៉ុប ទើបព្រមទៅចុះចូលនៅក្លឹបថ្មី។
ដល់តែ Man Utd បានបញ្ចប់រដូវកាលឈរលេខរៀងទី ៦ បានត្រឹមកៅអីនៅ Europa League ដូច្នេះមានលុយប៉ុន្មានលាន ក៏មិនអាចទិញយកកៅអីនៅពានអឺរ៉ុបលំដាប់ទី ១ បានដែរ។ ដូច្នេះបើចង់បាន De Jong លុះត្រារដូវកាលបន្ទាប់ អាចឈោងបានកៅអី UCL ហើយសាកល្បងចរចាគេម្តងទៀត។
រំឭកឲ្យដឹង កីឡាករវ័យ ២៥ ឆ្នាំ សេសសល់កុងត្រាជាមួយក្លឹបអាណាព្យាបាលនៅឯអេស្ប៉ាញដល់ចុងខែមិថុនា ឆ្នាំ ២០២៦ ឯណោះ។ អតីតកាលគេធ្លាប់សហការជាមួយ Ten Hag នៅឯក្លឹប Ajax។ ដោយឡែកងាកទៅមើលស្ថិតិរដូវកាលកន្លងទៅជាមួយអ្នកមានបុណ្យ បង្ហាញខ្លួន ៤៦ ប្រកួត រកបាន ៤ គ្រាប់និង Assist ៥ លើក៕
ប្រភព៖ Manchester Evening News