អ្នកចាត់ការក្រុមមេឃខៀវ Manchester City លោក Pep Guardiola ត្រូវបានគេរាយការណ៍ថា កំពុងតាមដានយ៉ាងយកចិត្តទុកដាក់បំផុត លើតារាឆ្នើមរបស់ក្រុម Real Madrid ម្នាក់ នៅពេលដែលស្ថានភាពកុងត្រាបច្ចុប្បន្នរបស់គេ កំពុងស្ថិតនៅក្នុងភាពសង្ស័យ ។
ជាក់ស្តែង កីឡាករដែលលោក Pep ចង់នាំយកមកកាន់ក្រុមនោះគឺខ្សែបម្រើ Toni Kroos នៅពេលដែលគេបានឈានចូលដល់ឆ្នាំចុងក្រោយនៃកិច្ចសន្យាបច្ចុប្បន្នរបស់គេ នៅទឹកដី Bernabue ហើយមួយរយ:ពេលចុងក្រោយ វាត្រូវបានគេយល់ថាតារាឆ្នើមសញ្ជាតិអាល្លឺម៉ង់រូបនេះ មិនមានបំណងនៅក្នុងការចុះហត្ថលេខាលើកុងត្រាថ្មីទៀតនោះឡើយ ។
លើសពីនេះ យោងតាមរបាយការណ៍ពី Todofichajes បាននិយាយថា គ្រូបង្វឹក លោក Guardiola ដឹងច្បាស់អំពីស្ថានភាពរបស់ Kroos នៅក្លិប Madrid ហើយគ្រូបង្វឹកសញ្ជាតិអេស្ប៉ាញរូបនេះ អាចនឹងបើកចំហរ ជុំវិញការផ្ទេរនាំយករូបគេ មកកាន់ទឹកដី Etihad នៅរដូវកាលក្រោយ ។
រំលឹកថា លោក Pep និង Kroos ធ្លាប់បានចំណាយពេលជាមួយគ្នា នៅអំឡុងរដូវកាល ២០១៣-១៤ នៅក្លិប Bayern Munich ដោយបានឈ្នះពានរង្វាន់ក្នុងស្រុកចំនួន ២ ដងជាមួយគ្នាផងដែរ ។
មិនតែប៉ុណ្ណោះ វាត្រូវបានគេដឹងថាទៀតថា ប្រសិនបើខ្សែបម្រើសញ្ជាតិអេស្ប៉ាញ ប្រាប់ Real Madrid ថាគេចង់ដើរចេញពីក្លិប នៅរដូវក្តៅនេះ ប្រភពខាងលើបានបង្ហាញថា ក្លិបយក្សអេស្ប៉ាញ ក៏នឹងមានឆន្ទ:ក្នុងការលក់គេចេញផងដែរ នៅក្នុងតម្លៃខ្លួនប្រមាណ ២០ លានអឺរ៉ូ ៕
ប្រភព: Sportsmole