ក្លិបហង្សក្រហម Liverpool ថ្មីៗនេះ បានប្រកាសអំពីការចាកចេញរបស់ខ្សែប្រយុទ្ធឆ្នើមរបស់ខ្លួន ដូចជា Divock Origi ដែលនឹងត្រូវផ្ទេរចេញដោយគ្មានតម្លៃខ្លួន ហើយនឹងត្រូវផ្ទេរទៅចូលរួមជាមួយក្រុម AC Milan ស្របពេលខ្សែប្រយុទ្ធ Sadio Mane បានសម្រេចទៅចូលរួមជាមួយក្រុម Bayern Munich នៅក្នុងតម្លៃខ្លួន ៣៥ លានផោន ។
ប៉ុន្តែយ៉ាងណាក៏ដោយ ក្លិប Liverpool ត្រូវបានគេរាយការណ៍ថា មានឆន្ទ:ក្នុងការស្តាប់សំណើផ្តល់ជូនពីសំណាក់ក្លិបដទៃ សម្រាប់ខ្សែប្រយុទ្ធ Mohamed Salah ផងដែរ ដោយនឹងដាក់តម្លៃខ្លួនប្រមាណ ៦០ លានផោន នៅទីផ្សារដោះដូរកីឡាករខាងមុខ ។
គួរឱ្យដឹងថា កីឡាករវ័យ ៣០ ឆ្នាំរូបនេះ បានជាប់គាំង ក្នុងការចរចាលើការបន្តកុងត្រាថ្មី អស់រយ:ពេលជាច្រើនខែមកហើយ រហូតមកដល់ពេលនេះ ការពិភាក្សារវាងភាគីទាំង ២ ហាក់មិនទាន់មានដំណោះស្រាយថ្មីនៅឡើយនោះទេ ។
មិនតែប៉ុណ្ណោះ ដោយមើលឃើញពីស្ថានភាពបែបនេះ ក្លិប Livrpool មិនចង់ប្រថុយបាត់បង់ខ្សែប្រយុទ្ធរូបនេះ ទៅដោយគ្មានតម្លៃខ្លួន នៅទីផ្សារដោះដូរដូវក្តៅឆ្នាំក្រោយនោះឡើយ ជាមួយនឹងការពិចារណាលក់គេចេញ នៅរដូវក្តៅនេះ ។
ហើយលើសពីនេះ បើយោងតាមគេហទំព័រ The Sun បានបង្ហាញឱ្យដឹងថា ក្រុម Liverpool ត្រៀមដាក់តម្លៃខ្លួន ៦០ លានផោន សម្រាប់កីឡាករ ដែលបានឈ្នះ PFA Player of the Year រូបនេះ បើទោះបីជាម្ចាស់ក្លិបហង្សក្រហម នឹងមិនអនុញ្ញាតឱ្យ Salah ផ្ទេរទៅចូលរួមជាមួយក្លិបគូប្រជែងនៅក្របខ័ណ្ឌ Premier League ក៏ដោយ ៕
ប្រភព: Sportsmole