តារាឆ្នើម Cristiano Ronaldo កំពុងមានអនាគតមិនប្រាកដប្រជាឡើយ បើទោះបីក្លឹប Man Utd បានប្តូរអ្នកចាត់ការថ្មីក៏ដោយ សម្រាប់រដូវកាល ២០២២/២៣។ ទន្ទឹមសុពលភាពកុងត្រាសេសសល់រយៈពេល ១២ ខែ កីឡាករព័រទុយហ្គាល់ ក៏មានភាគរយអាចនឹងដើរចេញ នៅទីផ្សារដោះដូរខាងមុខ ជាមួយនឹងតម្លៃផ្ទេរក្រោម ២០ លានផោន។
បើតាមសារព័ត៌មាន Retesport ចុះផ្សាយថា ក្លឹបនៅឯក្របខ័ណ្ឌអ៊ីតាលី គឺ AS Roma បានព្យាយាមគ្រប់យ៉ាង រកគ្រប់មធ្យោបាយ គ្រប់ច្រកល្ហកព្រោះហាក់ចង់បាន CR7 មកកាន់ក្លឹបរបស់ពួកគេខ្លាំង។ សូម្បីតែអតីតខ្សែការពារលោក Fabio Petruzzi ក៏ឆ្លៀតបង្ហើបដែរថា ខ្លួនទទួលបានព័ត៌មានច្បាស់ការពីក្លឹបចាស់ Roma ថាពិតជាកំពុងតាមចែចូវកីឡាករវ័យ ៣៧ ឆ្នាំពិតៗ។
ការដែលផ្ទេរ Ronaldo មកកាន់ក្លឹបនៅអ៊ីតាលីសារនេះ បើក្លាយជាការពិត នោះវានឹងជាការរួបរួមម្តងទៀតរវាងកំពូលកីឡាករ និងកំពូលអ្នកចាត់ការ ដែលធ្លាប់ជោគជ័យម្តងមកហើយកាលនៅក្លឹបអេស្ប៉ាញ Real Madrid។ តែយ៉ាងណា មិនច្បាស់កីឡាករព្រមជ្រើសរើសយកទ្រនំនេះឡើយ ព្រោះអី Roma ក៏ជាក្លឹបមិនបានលេង UCL នៅរដូវកាលក្រោយ ដូចតែ Man Utd អ៊ីចឹងដែរ។
រំឭកទៅមើលស្ថិតិរដូវកាលចាស់បន្តិច Ronaldo ដែលជាអ្នករកបានគ្រាប់បាល់ច្រើនបំផុតឲ្យក្លឹប Man Utd បង្ហាញខ្លួន ៣៩ ប្រកួត រកបាន ២៤ គ្រាប់និង Assist ៣ លើក។ ក្រៅតែពី Roma តាមចចាមអារ៉ាម CR7 ក៏កំពុងស្ថិតក្នុងការជជែករវាងភាគីក្លឹប Sporting CP និង Bayern Munich ថែមទៀតផង៕
ប្រភព៖ Retesport