យោងតាមរបាយការណ៍ចុងក្រោយមួយ បានបង្ហាញថា ក្លិបតោខៀវ Chelsea គ្រោងនឹងប្រើប្រាស់កីឡាករនៅក្នុងក្រុមរបស់ខ្លួនម្នាក់ ដើម្បីធ្វើជាថ្នូរ ដើម្បីថ្ពក់យកខ្សែការពារកណ្តាលរបស់ក្លិបសេះបង្កង់ Juventus កីឡាករ Matthijs De Ligt មកកាន់ទឹកដី Stamford Bridge ។
ជាក់ស្តែង ក្រុមរបស់គ្រូបង្វឹក លោក Thomas Tuchel មានបំណងចង់ពង្រឹងតំបន់ការពារ នៅក្នុងក្រុមរបស់លោក នៅរដូវកាលក្រោយនេះ នៅចំពេលដែលកីឡាករ De Ligt ត្រូវបានគេរាយការណ៍ចង់ចាកចេញពីក្លិបអ៊ីតាលី ក្រោយពីការចារចាលើកកុងត្រាថ្មី បានជាប់គាំង ។
លើសពីនេះ យោងតាមអ្នកជំនាញផ្នែកទីផ្សាររបស់ Sky Sports Italia លោក Gianluca Di Marzio បានរាយការណ៍ថា ក្រុមតោខៀវ Chelsea កំពុងរៀបចំធ្វើការដេញថ្លៃ ៣៨ លានផោន បូករួមជាមួយនឹងការផ្តល់ជូនខ្សែប្រយុទ្ធ Timo Werner ផងដែរ សម្រាប់នាំយកកីឡាករសញ្ជាតិហូឡង់មកវិញ ។
ទន្ទឹមនឹងនេះ វាត្រូវបានគេរាយការណ៍ទៀតថា កិច្ចព្រមមួយនេះអាចទំនងជាអាចកើតមានឡើង នៅពេលក្លិប Juventus កំពុងចាប់អារម្មណ៍ទៅលើខ្សែប្រយុទ្ធ Werner ផងដែរ បើទោះបីជាកីឡាករសញ្ជាតិអាល្លឺម៉ង់រូបនេះ មានប្រាក់ឈ្នួលដ៏ខ្ពស់មួយ ក៏ដោយ ៕
ប្រភព: AF