Ander Herrera បានទម្លាយពីមូលហេតុដែល Kylian Mbappe សម្រេចចិត្តបន្ដលេងនៅ Paris Saint-Germain។ ខ្សែប្រយុទ្ធបារាំងរូបនេះ ត្រូវបានរាយការណ៍ថា ចង់ចាកចេញពីទឹកដី Parc des Princes នៅពេលគេផុតកុងត្រាជាមួយ PSG ខណៈ Real Madrid ចាប់អារម្មណ៍។
ទោះបីជាមានសំណើពីក្លិបស្ដេចស ប៉ុន្ដែ Mbappe ចុងក្រោយនៅតែសម្រេចចិត្តលេងបន្ដឱ្យ PSG ដោយបន្ដកុងត្រារយៈពេល៣ឆ្នាំបន្ថែមទៀត។
កិច្ចសន្យាថ្មីរបស់ Mbappe ជាមួយ PSG នឹងធ្វើឱ្យគេលេងនៅបារាំងរហូតដល់ឆ្នាំ២០២៥ ហើយអតីតខ្សែប្រយុទ្ធរបស់ Monaco រូបនេះ មានមហិច្ឆតា អំពីទំព័រថ្មីនៃអាជីពរបស់ខ្លួន។
ទោះជាបានបោះបង់ឱកាសចូលរួមក្រុមជើងឯកអឺរ៉ុបបច្ចុប្បន្ន ប៉ុន្ដែ Mbappe មានទំនុកចិត្តថា គេអាចឈ្នះ Champions Leaue ជាមួយ PSG ហើយ Herrera ដែលជាមិត្តរួមក្រុម មានការគាំទ្រចំពោះការសម្រេចចិត្តនេះ។
ខ្សែបម្រើអេស្ប៉ាញ បានថ្លែងប្រាប់ AS ថា៖ “នៅ Real Madrid គេអាចក្លាយជាម្នាក់នៅក្នុងចំណោមកីឡាករល្អបំផុតនៅក្នុងប្រវត្ដិសាស្ដ្ររបស់ពួកគេ ជាមួយនឹងសុវត្ថិភាពដែលទៅលេងនៅទីនោះ”។
“ប៉ុន្ដែជាមួយ PSG គេអាចក្លាយជាកីឡាករល្អបំផុត នៅក្នុងប្រវត្តិសាស្ដ្ររបស់ក្លិប ហើយបង្កើតប្រវត្តិសាស្ដ្រនៅក្នុងទីក្រុងនៃស្រុកកំណើតរបស់គេ។ វាស្រដៀងទៅនឹង Ansu Fati នៅ Barcelona ដែរ។ Barcelona គឺជាជីវិតរបស់គេ ហើយវាដូចគ្នាទៅនឹង Kylian”៕
ប្រភព៖ Football Espana