ក្រៅតែពីក្លឹប Bayern Munich ឥឡូវក៏មានក្លឹបរួមលីគនៅឯអង់គ្លេសមួយបន្ថែមទៀត ចាប់អារម្មណ៍ចង់បានតារាឆ្នើម Cristiano Ronaldo។ នេះជាឱកាសសម្រាប់ខ្សែប្រយុទ្ធព័រទុយហ្គាល់ ប្រសិនចង់ជ្រើសយកក្លឹបបានលេងពានអឺរ៉ុប UEFA Champions League រដូវកាល ២០២២/២៣ ជាជាងការបន្តឈរជើងឲ្យ Man Utd ហើយបានត្រឹមកៅអីនៅ Europa។
តាមសារព័ត៌មាន The Athletic ចុះផ្សាយថា ម្ចាស់ក្លឹបថ្មី លោក Todd Boehly ចាប់អារម្មណ៍ចង់បង្កើតភាពភ្ញាក់ផ្អើល តាមរយៈការចរចាយកបុរសវ័យ ៣៧ ឆ្នាំចេញពី Old Trafford ហើយផ្លាស់មក Stamford Bridge នៅទីផ្សារដោះដូរខាងមុខ។ នេះភាគីក្លឹបតោខៀវកំពុងសកម្មខ្លាំង ក្នុងការជជែកពិភាក្សារវាងភាគីលោក Jorge Mendes ដែលជាភ្នាក់ងាររបស់កីឡាករផ្ទាល់។
មិនច្បាស់ថា កីឡាករឯណោះសម្រេចចិត្តបែបណាឡើយ តែតាមដឹងខាងក្លឹបបិសាចក្រហម ពិតជាមិនចង់លក់ចេញ Ronaldo ជារួមចង់បានវត្តមានអតីតកីឡាករ Juventus រូបនេះ ស្ថិតក្នុងផែនការណ៍ក្រោមការដឹកនាំរបស់លោក Erik ten Hag នៅរដូវកាលបន្ទាប់ ដ្បិតមិនបានលេងពានលំដាប់ទី ១ របស់ UEFA ក៏ពិតមែន។
គួរឲ្យដឹងសុពលភាពកុងត្រា Ronaldo សេសសល់ត្រឹមរយៈពេល ១២ ខែ ខណៈហាងឆេងតម្លៃខ្លួនគឺទាប ពោលចន្លោះត្រឹម ១០ ទៅ ១៥ លានផោនប៉ុណ្ណោះឯង។ ស្ថិតិនៅរដូវកាលចាស់ ឃើញថា CR7 ធ្វើបានល្អគួរសម ដោយបង្ហាញខ្លួនសរុប ៣៩ ប្រកួត រកបាន ២៤ គ្រាប់និង Assist ៣ លើកឲ្យក្លឹប៕
ប្រភព៖ The Athletic