បន្ទាប់ពីទទួលបានភាពខកចិត្តជាច្រើនមក ឥឡូវនេះ កីឡាកររបស់ក្រុម Real Madrid រូបនេះ ត្រូវបានគេរាយការណ៍ថា កំពុងស្នើសុំក្លិប ដើម្បីចាកចេញ នៅពេលទីផ្សារដោះដូរកីឡាករ នារដូវក្តៅនេះ បើកដំណើរការឡើងវិញ នៅពេលខាងមុខ ។
ជាក់ស្តែង ម្នាក់នោះគឺខ្សែប្រយុទ្ធ Mariano Diaz ខណ:ពេលដែលគេបានវិលត្រលប់មកចូលរួមជាមួយក្លិបយក្សអេស្ប៉ាញវិញ ពីក្រុម Lyon នៅក្នុងឆ្នាំ ២០១៨ ប៉ុន្តែដោសារតែបញ្ហារបួសជាប្រចាំ គួបផ្សំជាមួយនឹងការមើលរំលងពីសំណាក់គូបង្វឹកផងដែរ ។
គួរឱ្យដឹងថា នៅរដូវកាលដែលទើបតែបញ្ចាប់ទៅនេះ វាត្រូវបានគេមើលឃើញថា Mariano ត្រូវបានផ្តល់ឱកាសដោយ គ្រូបង្វឹក លោក Carlo Ancelotti តិចតួចបំផុត ខណ:ឥឡូវនេះ គេកំពុងស្វែងរកការចាកចេញពីក្លិប នៅមុនពេលកិច្ចសន្យាបច្ចុប្បន្ន នឹងត្រូវបញ្ចប់ នៅឆ្នាំ ២០២៣ ខាងមុខ។
មិនតែប៉ុណ្ណោះ វាត្រូវបានគេរំពឹងថា Mariano អាចនឹងចាកចេញ ដូច Luka Jovic និង Borja Mayoral នៅទីផ្សាររដូវក្តៅខាងមុខនេះ នៅពេលដែលក្លិប R.Madrid កំពុងសម្លឹងឃើញការលក់កីឡាករមួយចំនួនចេញ ដើម្បីកាត់បន្ថយការចំណាយបានខ្លះ សម្រាប់រដូវកាលក្រោយ ៕
ប្រភព: Marca