អ្នកចាត់ការក្រុម Barcelona លោក Xavi Hernandez ត្រូវបានគេរាយការណ៍ថា បានទាក់ទងដោយផ្ទាល់ទៅកាន់ខ្សែប្រយុទ្ធរបស់ក្លិប La Liga ដោយការតេទូរស័ព្ទទៅ ក្នុងគោលបំណង ដើម្បីបញ្ចុះបញ្ចូល ឱ្យរូបគេយល់ព្រមចុះហត្ថលេខាលើកុងត្រាថ្មីបន្ថែមទៀត ។
ជាការពិតណាស់ កិច្ចសន្យាបច្ចុប្បន្នរបស់ខ្សែប្រយុទ្ធ Ousmane Dembele នឹងត្រូវផុតកំណត់ ក្នុងរយ:ពេលត្រឹមតែប៉ុន្មានថ្ងៃខាងមុខនេះហើយ ដោយវាត្រូវបានគេរំពឹងថាកីឡាករសញ្ជាតិបារាំងរូបនេះ អាចនឹងចាកចេញពីក្លិបអេស្ប៉ាញ ក្នុងនាមជាកីឡាករគ្មានតម្លៃខ្លួន ដោយទាំង PSG និង Chelsea សុទ្ធសឹងតែកំពុងបង្ហាញចំណាប់អារម្មណ៍ខ្លាំង ។
តែទោះជាយ៉ាងណាក៏ដោយ យោងតាម Mirror ថ្មីៗនេះ បានបង្ហាញថា លោក Xavi បាននិយាយជាមួយកីឡាករវ័យ ២៥ ឆ្នាំ តាមរយ:ការទាក់ទងតាមទូរស័ព្ទ ដើម្បីធ្វើការបញ្ចុះបញ្ចូលគេជាលើកចុងក្រោយ ឱ្យបន្តស្នាក់នៅក្លិបតទៀត ។
មិនតែប៉ុណ្ណោះ ក្លិប Barcelona ត្រូវបានគេរាយការណ៍ថា បានផ្តល់ជូនឱ្យ Dembele នូវប្រាក់ខែសរុបចំនួន ១៨ លានអឺរ៉ូ ប៉ុន្តែអតីតខ្សែប្រយុទ្ធរបស់ក្លិប Dortmund រូបនេះ កំពុងស្វែងរកការទទួលប្រាក់ឈ្នួលនៅក្នុងចំនួនប្រហាក់ប្រហែលនេះ នៅពេលបង់ពន្ធរួច ៕
ប្រភព: Sportsmole