គ្រូបង្វឹករបស់ក្រុម AS Roma លោក Jose Mourinho ត្រូវបានគេរាយការណ៍ថា អាចនឹងផ្តល់ជូនឱកាសថ្មី សម្រាប់តារាឆ្នើម ដែលក្លិបតោខៀវ Chelsea មើលរំលងចោលម្នាក់ ដើម្បីនាំយកមកកាន់ទឹកដីអ៊ីតាលីវិញ នៅទីផ្សារដោះដូរកីឡាករ រដូវក្តៅនេះ ។
ជាក់ស្តែង តារាឆ្នើមដែលលោក Mourinho ចង់បាននោះ គឺខ្សែបម្រើ Saul Niguez នៅពេលដែលគេនឹងត្រូវវិលត្រលប់ទៅកាន់ក្លិប Atletico Madrid វិញ បន្ទាប់ពីបានចំណាយពេលខ្ចីជើងនៅក្រុមតោខៀវ Chelsea ត្រឹមតែមួយរដូវកាលប៉ុណ្ណោះ ចំពេលអនាគតនៅឯទឹកដី Wanda Metropolitano សម្រាប់រដូវកាលក្រោយ ក៏នៅមិនទាន់ច្បាស់លាស់ផងដែរ ។
ហើយយ៉ាងណា យោងតាមរបាយាករណ៍ចុះផ្សាយចុងក្រោយពី Mundo Deportivo បានបង្ហាញថា Niguez កំពុងក្លាយជាកីឡាករម្នាក់ ក្នុងចំណោមកីឡាករ ៣ រូបផ្សេងទៀត ដែលលោក Mourinho កំពុងពិចារណា នាំយកមកកាន់ក្រុមរបស់លោក នៅពេលដែលគាត់ព្យាយាមរៀបចំក្រុមសារឡើងវិញ សម្រាប់រដូវកាលក្រោយ ។
គួរឱ្យដឹងថា ការផ្លាស់ប្តូរសម្រាប់ Davide Frattesi ហាក់មានភាពជាប់គាំង ដែលជាហេតុធ្វើឱ្យ Niguez ក្លាយជាជម្រើសមួយ សម្រាប់ Roma នៅពេលដែលក្រុម Atletico កំពុងទាមទារតម្លៃខ្លួន ២៥ លានអឺរ៉ូ សម្រាប់កីឡាករសញ្ជាតិអេស្ប៉ាញរូបនេះ៕
ប្រភព: AF