Angel di Maria ក្រោយផុតកុងត្រាជាមួយក្លឹប Paris Saint-Germain ឥឡូវបានផ្លាស់មកទ្រនំថ្មី នៅលក្ខខណ្ឌផ្ទេរឥតតម្លៃខ្លួន ចុះចូលនៅក្លឹបអ៊ីតាលី Juventus។ តាមដំណឹងលឺថា ប្រាក់ពលកម្មរបស់កីឡាករអាហ្សង់ទីន មិនជាច្រើនហូរហៀរនោះទេ តែការមកសារនេះ គឺមានឆន្ទៈពិតប្រាកដ។
អតីតខ្សែប្រយុទ្ធក្លឹបសេដ្ឋីបារាំង អះអាងថា ដោយសារឃើញ Juventus ធ្លាក់ទម្រង់លេង មិនបានឈ្នះពានរង្វាន់ Serie A ជាពានធ្លាប់ឈ្នះកាន់ឆ្នាំ ទើបជ្រើសការផ្ទេរមកសេះបង្កង់ទាំងមិនស្ទាក់ស្ទើរ។ បញ្ជាក់ឲ្យដឹង រដូវកាល ២០២១/២២ ក្រុមដឹកនាំដោយលោក Massimilano Allegri ឈរលេខ ៤ មាន ៧០ ពិន្ទុ ធៀបនឹងម្ចាស់ជើងឯក AC Milan មានដល់ ៨៦ ពិន្ទុ។
Di Maria និយាយ៖ “នេះជាការចាប់ផ្តើមដំណើរថ្មីសម្រាប់ខ្ញុំ ពិតជារីករាយណាស់ ចាប់តាំងពីថ្ងៃដំបូង ដែលខ្ញុំឆ្លើយថា យល់ព្រម គឺប្រៀបដូចមនុស្សនៅទីនេះ ក្លាយជាគ្រួសារតែមួយ ពួកគេជឿជាក់មកលើខ្ញុំ ហើយមួយទៀតឆ្នាំទៅ ក្លឹបមិនបានឈ្នះពាន ដូច្នេះវាក៏ជាហេតុផលជំរុញទឹកចិត្តខ្ញុំបន្ថែមទៀតដែរ”។
លោកបន្ត៖ “ខ្ញុំចង់ព្យាយាមឈ្នះគ្រប់យ៉ាង នៅគ្រប់ទីកន្លែងទាំងអស់ ដូច្នេះទើបខ្ញុំ និយាយថាយល់ព្រម នឹងការផ្ទេរមកចុះចូលនៅ Juventus”។ រំឭកឲ្យដឹងបន្តិច នេះជាលើកដំបូងក្នុងអាជីព Di Maria សម្រាប់ការមកលេងឲ្យក្លឹបនៅអ៊ីតាលី ខណៈកន្លងមកធ្លាប់ហែលកាត់តែក្លឹបនៅអង់គ្លេស អាហ្សង់ទីន បារាំង ព័រទុយហ្គាល់ និងអេស្ប៉ាញ។
ប្រភព៖ BeSoccer