លោក Jose Mourinho អតីតកាលក៏ធ្លាប់ជាអ្នកចាត់ការក្លឹប Real Madrid ចន្លោះឆ្នាំ ២០១០ ដល់ ២០១៣ ផងដែរ ហើយថ្មីៗនេះត្រូវបានខ្សែការពារវ័យចំណាស់ ទម្លាយថា ក៏មានពេលមួយដែលវត្តមានគ្រូសញ្ជាតិព័រទុយហ្គាល់ ជាអ្នករាំង.ស្ទះដំណើរខ្លួន មិនឲ្យទៅចុះចូលនៅក្លឹបអេស្ប៉ាញបានសម្រេច។
នោះគឺ Giorgio Chiellini ដែលពេលនេះជាសមាជិកនៅក្លឹបអាមេរិក LAFC ជាមួយ Gareth Bale។ រំឭកទៅអតីតកាល កំឡុងពេលឈរជើងឲ្យសេះបង្កង់បានប៉ុន្មានឆ្នាំ គេក៏ធ្លាប់ស្ថិតក្នុងការចរចាផ្លាស់ទៅក្លឹបស្តេចស តែយ៉ាងណាត្រូវបានលោក Mourinho ជាអ្នកបិទផ្លូវ។
ប្រាប់ទៅសារព័ត៌មាន MARCA ខ្សែការពារសញ្ជាតិអ៊ីតាលី រៀបរាប់៖ “ខ្ញុំកៀកនឹងការផ្លាស់ទៅក្លឹប Real Madrid នៅឆ្នាំ ២០១០ និយាយទៅយូរណាស់មកហើយ តែ Mourinho ជាអ្នកធ្វើឲ្យការផ្ទេរមិនអាចសម្រេចទៅបាន ខ្ញុំអត់ដឹងថាមានរឿងអីទេ ពេលនោះខ្ញុំរាងនៅក្មេងដែរ គ្រាន់ដឹងថាចុងក្រោយកិច្ចព្រមព្រៀងមិនទទួលបានជោគជ័យ”។
លោកបន្ត៖ “តែយ៉ាងណាខ្ញុំក៏មានអារម្មណ៍ថាសំណាងដែលចាយពេលសឹងមួយអាជីពនៅ Juventus ហើយក៏បង្កើតកំណត់ត្រាល្អៗនៅទីនោះដែរ គ្រាន់ថាពិតណាស់ Real Madrid គឺតែងតែជាក្លឹបដ៏អស្ចារ្យបំផុតមួយក្នុងលោក”៕
ប្រភព៖ Marca