អ្នកចាត់ការរបស់ Chelsea លោក Thomas Tuchel បានសារភាពថាកូនក្រុមរបស់លោក មិនចង់ពាក់អាវលេខ៩នោះទេ ដោយសារតែពួកគេជឿថា លេខនេះមានបណ្ដាសារ។
លេខ៩នៅ Chelsea បច្ចុប្បន្នកំពុងនៅទំនេរ បន្ទាប់ពីការចាកចេញរបស់ Romelu Lukaku ទៅកាន់ Inter Milan ដោយខ្សែប្រយុទ្ធបែលហ្ស៊ិករូបនេះ ហាក់ពិបាកក្នុងការបង្ហាញសមត្ថភាព ដូចការរំពឹងទុកនៅក្នុងក្រុមលោក Tuchel។
ក្រៅពី Lukaku មានកីឡាករកំពូលៗជាច្រើនរូបដូចជា Fernando Torres, Ramadel Falcao, Alvaro Morta និង Gonzalo Higuain ជាដើម ដែលពិបាកក្នុងការរកគ្រាប់បាល់ នៅពេលដែលពួកគេពាក់អាវលេខ៩ នៅក្នុងក្រុមតោខៀវ។
លោក Tuchel បាននិយាយថា៖ “វាជាបណ្ដាសារ, មានគេប្រាប់ខ្ញុំថា វាជាបណ្ដាសារ។ វាមិនមែននៅក្នុងករណីដែលយើងទុកវាឱ្យនៅទំនេរ ដោយសារបញ្ហាបច្ចេកទេសអ្វីទេ”។
“មិនមានការទាមទារខ្ពស់នោះទេ សម្រាប់លេខ៩។ កីឡាករពេលខ្លះ ចង់ប្ដូរលេខ ប៉ុន្ដែគួរឱ្យភ្ញាក់ផ្អើល ដែលគ្មាននរណាចង់ប៉ះលេខនេះ”៕
ប្រភព៖ Goal