យោងតាមរបាយការណ៍ចុះផ្សាយចុងក្រោយមួយ បានបង្ហាញថាក្លិបបិសាចក្រហម Manchester United កំពុងរៀបចំធ្វើកិច្ចព្រមព្រៀងមួយ ដើម្បីចុះហត្ថលេខាលើតារាឆ្នើមរបស់ក្រុមយក្សអ៊ីតាលី Juventus នៅមុនពេលទីផ្សារដោះដូរកីឡាករបិទទ្វារ ។
ស្របពេលជាមួយគ្នានេះផងដែរ យោងតាមសារព័ត៌មាន Telegraph បានបង្ហាញឱ្យដឹងថា ក្លិប Juventus ក៏មានបំណងអនុញ្ញាតឱ្យខ្សែបម្រើ Adrien Rabiot ចាកចេញបាន នៅក្នុងទីផ្សាររដូវក្តៅនេះផងដែរ ជាមួយនឹងការដាក់ចេញតម្លៃខ្លួនចន្លោះ ១២,៥ ទៅ ១៧ លានផោន ។
តែទោះជាយ៉ាងណាក៏ដោយ វាត្រូវបានបានគេដឹងថាក្លិប Man United ទំនងជាមិនអាចផ្តល់ជូនតាមតម្លៃខ្លួន ដែលក្លិប Serie A ទាមទារសម្រាប់ខ្សែបម្រើសញ្ជាតិបារាំងរូបនេះ បាននោះឡើយ ។
គួរឱ្យដឹងថា Rabiot ស្ថិតក្នុងឆ្នាំចុងក្រោយនៃកិច្ចសន្យាបច្ចុប្បន្នរបស់គេ នៅកីឡដ្ឋាន Allianz ខណ:កីឡាកររូបនេះ ត្រូវបានដឹងថា មិនមែនជាផ្នែកនៃផែនការរបស់អ្នកចាត់ការក្រុម លោក Massimiliano Allegri នោះ ហើយគេមានសេរីភាពក្នុងការចាកចេញពីក្លឹប ប្រសិនបើមានការផ្តល់ជូនត្រឹមត្រូវមកដល់ ។
ក្រុមរបស់លោក Erik ten Hag បានបង្វែមកចាប់អារម្មណ៍លើ Rabiot បន្ទាប់ពីការព្យាយាម ក្នុងការចុះហត្ថលេខានាំយក Frenkie de Jong ពីក្រុម Barca ហាក់ដូចជាមានភាពពិបាកខ្លាំង នៅចំពេលក្លិប Chelsea ក៏កំពុងចូលរួមប្រជែង នាំយកតារាឆ្នើមហូឡង់រូបនេះដែរ ៕
ប្រភព: Sportskeeda