យោងតាមរបាយការណ៍ចុងក្រោយមួយ បានបង្ហាញថាក្លិបសេះបង្កង់ កំពុងសម្លឹងចង់បានកូនក្រុមរបស់គ្រូបង្វឹកលោក Erik ten Hag ម្នាក់ នៅចំពេលក្លិបបិសាចក្រហម Manchester United កំពុងស្ថិតនៅក្នុងការពិភាក្សា ដើម្បីចុះហត្ថលេខាលើខ្សែបម្រើ Adrien Rabiot ពីក្លិបអ៊ីតាលី ។
នៅមួយរយ:ពេលកន្លងមកនេះ ក្លិប Man Utd ហាក់ជួបប្រទះបញ្ហាស្មុគស្មាញយ៉ាងខ្លាំង ដើម្បីចុះហត្ថលេខាលើ Frenkie de Jong ពីក្រុម Barcelona ដែលជាហេតុធ្វើឱ្យពួកគេ ងាកមកចាប់អារម្មណ៍លើ កីឡាករ Rabiot ជំនួសវិញ ស្របពេលភាគីអ៊ីតាលី រីករាយនឹងទទួលយកសំណើរ ១៥ លានផោន ពីក្រុមអង់គ្លេស ។
តែទោះជាយ៉ាងណាក៏ដោយ បើយោងតាមអ្នកកាសែត Gianluca Di Marzio របស់ Sky Sport Italia បានបង្ហាញថា កិច្ចព្រមព្រៀងនេះកំពុងតែមានភាពជាប់គាំង នៅពេលក្លិប Juve សង្ឃឹមថានឹងជំនួសតំណែងរបស់ Rabiot ជាមួយកីឡាករ Leandro Paredes របស់ PSG វិញ ។
មិនតែប៉ុណ្ណោះ ក្រុម Serie A កំពុងស្វែងរកជម្រើសខ្សែប្រយុទ្ធថ្មី ដើម្បីមកលេងអមជើងជាមួយកីឡាករ Dusan Vlahovic ផងដែរ ដោយពួកគេបានជ្រើសរើសយកតារឆ្នើមរបស់ក្រុម Man Utd គឺកីឡាករ Anthony Martial ។
Juve ត្រូវបានគេដឹងថាជាអ្នកកោតសរសើររបស់ Martial ជាយូរមកហើយ បើទោះបីជាបច្ចុប្បន្នពួកគេក៏កំពុងស្វែងរកកិច្ចព្រមព្រៀងដ៏មានសក្តានុពលមួយ សម្រាប់ខ្សែប្រយុទ្ធ Memphis Depay របស់ Barcelona ដែរក៏ដោយ៕
ប្រភព: Metro