ក្លឹបដឹកនាំដោយអ្នកចាត់ការលោក Pep Guardiola បាននឹងកំពុងស្វែងរកកីឡាករថ្មី មកបំពេញតំណែងការពារស្លាប ក្រោយ Oleksandr Zinchenko ចាកចេញទៅ ហើយឥឡូវដាក់គោលដៅអាទិភាពទៅលើកីឡាករជាច្រើន ក៏រួមទាំងសមាជិកនៃក្លឹប Atletico Madrid ផងដែរ។
នោះគឺការចង់បាន Renan Lodi ជាកីឡាករជាប់កុងត្រាដល់ចុងខែមិថុនា ឆ្នាំ ២០២៥ ជាមួយក្លឹប At Madrid។ ខណៈនេះ កីឡាករក៏បន្តរីករាយជាមួយក្លឹបក្នុងទឹកដីអេស្ប៉ាញ ជាហេតុនាំឲ្យក្លឹបអាណាព្យាបាលរំអុកហ៊ានដាក់តម្លៃកល់ ផ្ញើទៅ City ពោលដល់ ៧០ លានអឺរ៉ូឯណោះ។ នេះបើតាមសារព័ត៌មាន The Telegraph បានចុះផ្សាយ។
កីឡាករប្រេស៊ីល រដូវកាលចាស់ ធ្វើបានល្អខ្លាំង តាមរយៈ ការបង្ហាញខ្លួន ៤២ ប្រកួត ក៏ឆ្លៀតរកបាន ៤ គ្រាប់និង Assist ៥ លើកផងដែរ ក្រៅតែពីដើរតួជាជញ្ជាំងការពារដ៏រឹងមាំ។ តាមពិតទៅកីឡាកររូបនេះ មានលក្ខណៈសឹងតែដូច Zinchenko ពោលលេងការពារស្លាបក៏បាន ហើយក៏អាចបម្លែងឱកាសម្ដងម្កាលទៅបម្រើប្រយុទ្ធបានដូចគ្នា។
យើងកំពុងរង់ចាំមើល តើ City នឹងឆ្លើយតបបែបណា អំពីការចង់បានរបស់ At Madrid? ក្រៅតែពី Lodi ក្លឹបម្ចាស់ដី Etihad ក៏មានគោលដៅផ្សេងទៀត លើកីឡាករ Guerreiro, Sosa, Tierney និង Ait-Nouri សុទ្ធសឹងជាខ្សែការពារស្លាបល្អៗ តែជាប់កុងត្រាជាមួយក្លឹបអាណាព្យាបាលទាំងអស់៕
ប្រភព៖ The Telegraph