តាមរយៈការបញ្ជាក់កន្លងទៅ អ្នកចាត់ការថ្មី លោក Christophe Galtier បានបង្ហើបថា ក្លឹប Paris Saint-Germain នឹងមានការចុះហត្ថលេខានាំចូលខ្សែប្រយុទ្ធថ្មី ជាការឆ្លើយតបទៅនឹងការចាកចេញរបស់ Mauro Icardi ក៏ដូចជា Kalimuendo ដែលបានទៅចូលរួមឲ្យក្លឹប Rennes។ រីឯករណី Keylor Navas គេមិនចង់ឈរជាដៃទីពីរ ដូច្នេះក៏មានក្លឹបផ្សេងចាប់អារម្មណ៍គេ។
អំពីការនាំចូលខ្សែប្រយុទ្ធចំណូលថ្មី ក៏ស្រាប់តែមានការចុះផ្សាយដ៏គួរឲ្យចាប់អារម្មណ៍នៅយប់មិញ ថាក្លឹប PSG បានទាក់ទងទៅក្លឹប Manchester United សួរនាំអំពីលទ្ធភាពក្នុងការនាំយក Marcus Rashford មកកាន់ក្លឹបមានមូលដ្ឋានក្នុងទីក្រុងប៉ារីស ឲ្យបានសម្រេចត្រឹមទីផ្សារដោះដូររដូវក្តៅ កៀកនឹងបញ្ចប់នៅថ្ងៃទី ០១ កញ្ញា។
បើតាមអ្នកសារព័ត៌មានលោក Julien Laurens បានចុះផ្សាយ៖ “មានការបញ្ជាក់ច្បាស់អំពីការចរចារវាង PSG និង Marcus Rashford ជារបាយការណ៍ពី L’Equipe ដោយ PSG ត្រូវការកីឡាករលេងតំណែងស្លាប ហើយ Rashford គេក៏សម្លឹងការប្រកួតប្រជែងថ្មី មុនការផុតកុងត្រាមួយឆ្នាំនៅក្លឹបអាណាព្យាបាល Man Utd”។
រំឭកថា បើតាមហាងឆេងតម្លៃខ្លួនកីឡាករអង់គ្លេសខាងលើ អាចថ្លៃល្បាក់ ៥០ ទៅ ៦០ លានអឺរ៉ូ ដែលនេះជាតម្លៃក្រែលមួយដែរ តែសម្រាប់ PSG មិនទាន់ឃើញបញ្ចេញកញ្ចប់ចាយវាយធំណាមួយផងកន្លងមក អ៊ីចឹងការចរចាក៏អាចនឹងមានសង្ឃឹមខ្ពស់ បើក្លឹបដាក់ចិត្តចង់បានពិតមែន៕
ប្រភព៖ L’Equipe