ក្លឹបអធិរាជស Real Madrid បានបើកចិត្ត ព្រមលក់ចេញ Casemiro ទៅហើយ ដោយដំណើរការសម្រេចផ្ទេរចូល Man Utd ទំនងប្រកាសនៅពេលយ៉ាងយូរ ២៤ ម៉ោងទៀត។ ទន្ទឹមការចាកចេញរបស់ខ្សែបម្រើការពារសញ្ជាតិប្រេស៊ីល ក៏នាំឲ្យក្លឹបអេស្ប៉ាញគិតនឹងយកអ្នកថ្មីមកជំនួស ហើយក៏មិនអែអង់ឲ្យផុតទីផ្សារដោះដូរសារនេះដែរ។
ខាងក្លឹបស្ថិតក្នុងទីក្រុង Madrid បានដាក់គោលដៅទៅកាន់កីឡាករ Bruno Guimaraes របស់ក្លឹប Newcastle United ភ្លែត ពោលជាគោលដៅអាទិភាព ចង់សម្រេចការនាំយកមុនថ្ងៃទី ៣១ សីហាខាងមុខ។ បុរសវ័យ ២៤ ឆ្នាំ ទើបតែមកចុះចូលនៅសារិកាព្រៃ កាលពីខែមករា ក្នុងតម្លៃផ្ទេរ ៤០ លានផោន ហើយបង្ហាញខ្លួន ១៩ ប្រកួត ក៏រកបាន ៥ គ្រាប់ឲ្យក្លឹប។
បើតាមសារព័ត៌មាន Dario AS ចុះផ្សាយថា ក្លឹបដឹកនាំដោយអ្នកចាត់ការលោក Carlo Ancelotti កំពុងតែដុ.តដៃដុ.តជើង ចង់ចរចាយកកីឡាករប្រេស៊ីលចេញពី Newcastle ឲ្យបានឆាប់។ នេះលក់ Casemiro បានប្រាក់ប្រហែល ៥០ ទៅ ៦០ លានផោន ក៏ត្រូវបង្វែរមកចាត់ចែងយក Guimaraes វិញនៅតម្លៃប្រហែល ៣៥ លាន ទៅ ៤៥ លានផោនប៉ុណ្ណោះឯង។
យ៉ាងណាបើយកកីឡាករខាងលើមិនបាន ក៏ Real នៅតែមានជម្រើសកីឡាករប្រើប្រាស់ក្នុងដៃជាច្រើនដែរ ជាក់ស្តែងដូច Aurelien Tchouameni ដែលក្លឹបទើបតែយកបានកាលពីប៉ុន្មានខែមុន។ បញ្ជាក់ថា ប្រកួតបើករដូវកាលកន្លងទៅ Madrid បានយកឈ្នះ ២-១ នាជុំដំបូង ហើយត្រៀមទៅប៉ះ Celta Vigo នៅថ្ងៃអាទិត្យខាងមុខ៕
ប្រភព៖ Dario AS