បើទោះបីក្លឹប Sporting Lisbon ជាអតីតក្លឹបចាស់ ព្យាយាមចង់បាន Cristiano Ronaldo ជាលើកទី ២ តែកីឡាករហាក់មិនទាន់គិតគូរនឹងវិលទៅទីនោះឡើយ ផ្ទុយទៅវិញបានមានកូនចិត្តជាមួយក្លឹបដទៃទៀត នៅលីគកំពូលទាំង ៥ ដដែល ប្រសិនត្រូវឈានដល់ការចាកចេញពី Manchester United នាពេលដ៏ខ្លីខាងមុខ។
តាមសារព័ត៌មាន Bild ចុះផ្សាយថា កីឡាករព័រទុយហ្គាល់ បានជ្រើសយកក្លឹប Borussia Dortmund ជាទ្រនំបន្ទាប់ ប្រសិនជាចរចាលក្ខខណ្ឌចាកចេញត្រូវរ៉ូវជាមួយក្លឹបអាណាព្យាបាល។ មូលហេតុក៏ដោយសារចង់វិវត្តខ្លួនទៅកាន់លីគថ្មី និងបានលេងទាំង Champions League ផងដែរ។ បញ្ជាក់ Dortmund រដូវកាលចាស់ឈរលេខ ២ នៅក្របខ័ណ្ឌ Bundesliga។
យ៉ាងណាយើងមិនទាន់ច្បាស់ថា ដំណើរការចរចានឹងមានភាគរយសម្រេចទៅបានឬបែបណាទេ ដោយត្រង់ថា ត្រឹមពាក់ព័ន្ធនឹងតម្លៃផ្ទេរ គឺមិនជាបញ្ហាអ្វីឡើយ តែត្រង់តម្លៃពលកម្ម ពីមុនមក Dortmund មិនធ្លាប់ចាយធំ ផ្តល់ឲ្យកីឡាករលើស ២០០ ០០០ អឺរ៉ូ/សប្តាហ៍។
គ្រាន់លេចលឺព័ត៌មានពេលចុងក្រោយ និយាយអំពីផលចំណេញរបស់ក្លឹបវិញ ក៏ដូចតែបណ្តាក្លឹបមុនៗ ក្រោយតែកើតមានចចាមអារ៉ាមនេះ កាន់តែធ្វើឲ្យតម្លៃទីផ្សារហ៊ុនរបស់ Dortmund បានមានការកើនឡើង ដោយឡើងពី ៤ អឺរ៉ូ មកទល់ជាង ៤,៤០ អឺរ៉ូក្នុងមួយភាគហ៊ុន ទាំងដែលព័ត៌មានការផ្ទេរចូល Ronaldo មិនទាន់ជាផ្លូវការផងនោះ៕
ប្រភព៖ Bild