អតីតខ្សែប្រយុទ្ធរបស់ក្រុម Arsenal និង Everton លោក Kevin Campbell ថ្មីៗនេះ បានជំរុញឱ្យក្លិបហង្សក្រហម Liverpool តាមចុះហត្ថលេខាលើខ្សែប្រយុទ្ធឆ្នើមរបស់ក្រុមយក្សអាល្លឺម៉ង់ Bayern Munich មកកាន់ទឹកដី Anfield មុនពេលទីផ្សារ រដូវក្តៅនេះបិទទ្វារ ។
ជាក់ស្តែង កីឡាករដែលលោក Campbell ចង់ឱ្យ Liverpool នាំយកមកនោះ គឺខ្សែប្រយុទ្ធ Leroy Sane នៅពេលដែលគេ កំពុងទទួលបានភាគខកចិត្ត ក្រោយការដឹកនាំរបស់លោក Julian Nagelsmann នៅរដូវកាលនេះ ។
អតីតកីឡាកររបស់ក្រុម Man City រូបនេះ បច្ចុប្បន្នមានតម្លៃខ្លួន ប្រហែល ៥៤ លានផោន ហើយនៅសល់កុងត្រារយ:ពេល ៣ ឆ្នាំទៀត ជាមួយក្លិប Bayern ប៉ុន្តែ លោក Campbell ជឿជាក់ថា Liverpool គួរតែធ្វើការការផ្ទេរយក Sane មកកាន់ក្លិបនៅរដូវក្តៅនេះ ។
លើសពីនេះ គាត់បាននិយាយប្រាប់ Football Insider ថា ៖ “ខ្ញុំគិតថា Sane មានកន្លែង នៅក្នុងក្រុម Liverpool ។ ប្រសិនជា Liverpool ដាក់ឱ្យ Diaz និង Sane លេងម្នាក់មួយប្រកួត និងខ្ញុំប្រាកដចិត្តថា អ្នកគាំទ្រនឹងពេញចិត្ត។ ក្រុមជាច្រើន ចូលចិត្តមានជម្រើសខ្លាំងនៅក្នុងក្រុម។ អ៊ីចឹងនិយាយដោយស្មោះត្រង់ទៅ ខ្ញុំគិតថាវានឹងក្លាយជាការផ្លាស់ប្តូរដ៏ឆ្លាតវៃ” ៕
ប្រភព: Sportbible