ក្លិប Tottenham Hotspur មានការភ្ជាប់យ៉ាងភ្ញាក់ផ្អើលទៅនឹង អតីតខ្សែប្រយុទ្ធស្លាបម្នាក់របស់ Manchester United នៅក្នុងទីផ្សារដោះដូររដូវក្ដៅនេះ។
យោងតាមប្រភពពី Daily Mail បានរាយការណ៍ថា ខ្សែប្រយុទ្ធជម្រើសជាតិវេលស៍ Daniel James ជាកីឡាករគោលដៅដែលនឹងផ្លាស់មកក្លិបមាន់ខ្នាយមាស ដើម្បីជំនួស Bryan Gil ដែលត្រៀមផ្ទេរទៅក្លិបអេស្ប៉ាញ Valencia ក្រោមកិច្ចសន្យាខ្ចីជើង។
Gil បានចូលរួម Spurs ក្នុងរដូវក្ដៅឆ្នាំ២០២១ ជាថ្នូរនៃការផ្ទេរ ខ្សែបម្រើ Erik Lamela ទៅ Sevilla ប៉ុន្ដែបន្ទាប់ពីបានបង្ហាញខ្លួនបាន២០ប្រកួតនៅក្លិបដែលមានមូលដ្ឋានក្នុងទីក្រុងឡុងដ៍ ខ្សែប្រយុទ្ធវ័យ២១ឆ្នាំរូបនេះ ត្រូវបានដាក់ឱ្យក្លិបប្រចៀវខ្មៅ Valencia ខ្ចីជើងនៅពាក់កណ្ដាលរដូវកាលមុន ហើយនឹងបន្ដលេងនៅក្លិបអេស្ប៉ាញមួយនេះមួយរដូវកាលទៀត។
ហើយ James ដែលបច្ចុប្បន្នកំពុងលេងឱ្យ Leeds United អាចជាកីឡាករគោលដៅចម្បងសម្រាប់ក្រុមលោក Antonio Conte មុនពេលទីផ្សារដោះដូររដូវក្ដៅនេះបិទដំណើរការ។
កីឡាករវ័យ២៤ឆ្នាំរូបនេះ បានចូលរួម Leeds នៅរដូវក្ដៅឆ្នាំមុនក្រោយចាយពេលពីរឆ្នាំនៅ Man Utd ដោយទទួលបានឱកាសបង្ហាញខ្លួន៧៤ប្រកួត៕
ប្រភព៖ talkSPORT