Bruno Fernandes បានឆ្លើយតបទៅនឹងការលើកឡើងថា សមត្ថភាពនៅលើទីលានរបស់គេមានការធ្លាក់ចុះសមត្ថភាពរបស់គេនៅ Manchester United ដោយសារតែការមកដល់របស់ Cristiano Ronaldo។
ខ្សែបម្រើព័រទុយហ្កាល់រូបនេះ ជាតារាប្រចាំក្រុមបិសាចក្រហម ក្នុងរដូវកាល ២០២០-២១ បន្ទាប់ពីរកគ្រាប់បាល់បាន២៨គ្រាប់ និងបញ្ជូនឱ្យមិត្តរួមក្រុម១៧គ្រាប់ នៅក្នុងរដូវកាលពេញលេញដំបូងជាមួយក្លិបនេះ។
នៅរដូវក្ដៅឆ្នាំ២០២១ នៅពេលដែល Ronaldo ត្រលប់មកទឹកដី Old Trafford វិញ ក្រោយផ្ទេរពី Juventus មានសារព័ត៌មានជាច្រើនបានចុះផ្សាយថា សមត្ថភាពរបស់ Bruno មានការធ្លាក់ចុះ ដោយសារឥទ្ធិពលរបស់ ម្ចាស់ពាន Ballon d’Or ៥សម័យ។
ប៉ុន្ដែខ្សែបម្រើវ័យ២៨ឆ្នាំបានតបវិញថា៖ “គ្រាប់បាល់ assist របស់ខ្ញុំភាគច្រើនគឺសម្រាប់គាត់ ខ្ញុំគិតថាវាមិនយុត្តិធម៌នោះទេ។ ខ្ញុំបង្ហាញសមត្ថភាពមិនបានល្អ ដោយសារតែស្ថិតិរបស់ខ្ញុំផ្ទាល់ប៉ុណ្ណោះ”។
“វាមិនមែនដោយសារតែ Cristiano ឬខ្លួនខ្ញុំនោះទេ។ មុនការមកដល់របស់គាត់ ខ្ញុំក៏ជាអ្នកស៊ុតប៉េណាល់ទីដែរ ប៉ុន្ដែខ្ញុំមានឱកាសពីរលើកក្នុងការស៊ុតប៉េណាល់ទី ក្នុងរដូវកាលមុន ហើយខ្ញុំស៊ុតមិនចូលទាំងពីរលើក។ ដូច្នេះខ្ញុំមិនអាចបន្ទោស Cristiano សម្រាប់ការស៊ុតប៉េណាល់ទីបានទេ ជាពិសេសពេលដែលគាត់ស៊ុតចូលគ្រាប់បាល់ទាំងនោះ”៕
ប្រភព៖ talkSPORT