ជាការពិតនៅពេលចុងក្រោយ បើតាមចចាមអារ៉ាមជាច្រើន ល្ហិចល្ហៀងក្លឹបធំៗ ពិបាកនឹងឆ្លើយ “Yes” ទៅកាន់ Cristiano Ronaldo ក៏ដោយសារតែទាមទារការចំណាយក្រាស់លើប្រាក់ឈ្នួល ជួនពេលកត្តាអាយុរបស់បុរសសញ្ជាតិព័រទុយហ្គាល់ ក៏ហៀរចូលវ័យ ៣៧ ឆ្នាំទៅហើយ។
យ៉ាងណាថ្មីៗងាកមកក្លឹបកំពុងឡើងកូដនៅ Serie A គឺ Udinese ហាក់មានចេតនា បង្ហាញពីចំណាប់អារម្មណ៍ចង់បាន CR7 មកចូលរួមនៅលីគកំពូលអ៊ីតាលីជាថ្មី។ អតីតកាល Ronaldo ធ្លាប់លេងនៅ Juventus បាន ៣ ឆ្នាំដែរ មុនជ្រើសការផ្ទេរមកក្លឹប Man Utd នៅឯទឹកដីអង់គ្លេស។
ងាកទៅការបង្ហោះមួយរបស់សារព័ត៌មាន DAZN ក៏ស្រាប់តែរំលេចគណនីផ្លូវការរបស់អ្នកចាំទីក្លឹប Udinese កីឡាករ Marco Silvestri ថា៖ “Cristiano មកចូលរួមជាមួយពួកយើងនៅ Udinese មក”។ អ្វីដែលអស្ចារ្យបំផុតគឺគណនីផ្លូវការក្លឹប ក៏បានបង្ហោះរូបនោះ ហើយថែមទាំង Mention ឈ្មោះ Cristiano ចំៗថែមទៀត។
យើងទៅមើលចំណាត់ថ្នាក់នៅ Serie A បន្តិច ក្លឹប Udinese កំពុងរីករាយនឹងរដូវកាលថ្មី ដោយ ៧ ប្រកួត ឈ្នះ ៥ ស្មើ ១ ចាញ់ ១ ឥឡូវឈរលេខ ៣ មាន ១៦ ពិន្ទុ ចាញ់ក្លឹបឈរកំពូលតារាង Atalanta និង Napoli តែ ១ ពិន្ទុគត់។ ងាកទៅអតីតក្លឹបចាស់ Juventus របស់ Ronaldo ខ្ទាតឆ្ងាយ ដល់លេខ ៨ បាត់ទៅហើយ៕
ប្រភព៖ BeSoccer