ម្តាយបង្កើតរបស់អ្នកគាំទ្រនៃក្មេងប្រុសតូចរបស់ក្លឹប Everton បានចេញមកនិយាយ ពាក់ព័ន្ធទង្វើរបស់ Cristiano Ronaldo កាលពីខែមេសាកន្លងទៅ ដែលបានគ្រវាសដៃធ្វើឲ្យទូរស័ព្ទកូនប្រុសខ្លួនធ្លាក់បែក នៅជំនួបទល់ក្លឹប Manchester United។ មកទល់ពេលនេះ ខាងសមាគមបាល់ទាត់អង់គ្លេស ហៅកាត់ FA ក៏បានរៀបចំការផាក.ពិន័យទៅលើ CR7 តែយ៉ាងណាខាងភាគីរងគ្រោះហាក់មិនទាន់អស់ចិត្តទាល់តែសោះ។
ចាំបានថា ទិដ្ឋភាពនៅកីឡដ្ឋាន Goodison Park ពេលនោះ គឺ Everton បានយកឈ្នះ ១-០ ហើយក្រោយចប់ការប្រកួត Ronaldo បានដើរសំដៅមកបន្ទប់ផ្លាស់សំលៀកបំពាក់ តែមិនដឹងហេតុផលអ្វីជាក់ច្បាស់ កីឡាករក៏បានគ្រវាសដៃធ្វើឲ្យក្មេងប្រុសវ័យ ១៤ ឆ្នាំ ធ្លាក់បែកទូរស័ព្ទ។
អ្នកស្រី Sarah Kelly ត្រូវជាម្តាយរបស់ក្មេងប្រុស និយាយប្រាប់ The Mirror៖ “សង្ឃឹមថា Ronaldo នឹងទទួលបានការពិន័យឲ្យសក្ដិសមនឹងទង្វើ គាត់មិនអាចព្យាយាមគេចវេះពីវាបានឡើយ ទង្វើគាត់ពិតជាមិនអាចទទួលយកបាន ហើយតាមថា គាត់គួរតែដោះស្រាយគ្រប់យ៉ាង តាំងពី ៦ ខែមុន មិនមែនពេលនេះទេ”។
លោកបន្ត៖ “កូនប្រុសខ្ញុំ ក៏តែងតែនិយាយអំពីរឿងហ្នឹង ហើយមកដល់ឥឡូវក៏មិនទាន់ទទួលបានទូរស័ព្ទត្រលប់មកល្អវិញដែរ Ronaldo គួរតែជាអ្នករ៉ាប់រងរឿងទាំងអស់នេះ តើគេអាចគេងលក់ដោយរបៀបណា ទាំងដែលដឹងខ្លួនឯងច្បាស់ថាបានធ្វើទង្វើមិនល្អដាក់អ្នកគាំទ្រវ័យក្មេងម្នាក់”៕
ប្រភព៖ Goal