អតីតខ្សែប្រយុទ្ធហូឡង់លោក Marco van Baten បាននិយាយលើកសរសើរ កីឡាករគោលដៅមួយរូបរបស់ Manchester United ចំពោះឥទ្ធិពលរបស់គេនៅក្នុងក្រុមជម្រើសជាតិហូឡង់ ខណៈលោកគិតថា ជារឿងចម្លែកដែល Virgil van Dijk មិនសូវលេងបានល្អ។
អតីតកីឡាករឆ្នើមរបស់ AC Milan លោក Van Basten បាននិយាយពីក្រុមជម្រើសជាតិហូឡង់ ដែលទទួលបានជ័យជម្នះ ១-០ លើបែលហ្ស៊ិក ហើយគ្រងតំណែងកំពូលតារាង UEFA Nations League វគ្គចែកពូល ហើយឡើងទៅកាន់វគ្គ៤ក្រុមចុងក្រោយ។
ក្រុមហូឡង់ទទួលបានលទ្ធផលល្អសម្រាប់ការកសាងទំនុកចិត្តមុនពេលប្រកួត World Cup 2022 ដោយមិនទាន់បរាជ័យនៅឡើយទេ ក្នុងចំណោម១៥ប្រកួតចុងក្រោយ តាំងពីលោក Louis van Gaal ចូលកាន់តួនាទីជាគ្រូបង្គោល ជាលើកទី៣។
Van Dijk ជាអ្នករកគ្រាប់បាល់ជ័យជម្នះសម្រាប់ក្រុមហូឡង់ ក្នុងជំនួបទល់បែលហ្ស៊ិក ប៉ុន្ដែលោក Van Basten មានក្ដីបារម្ភចំពោះការលេងរបស់គេ ក្នុងតំណែងការពារកណ្ដាល។
ប៉ុន្ដែលោកបាននិយាយសរសើរ Jurrien Timber ដែលទទួលបានទំនុកចិត្តពីគ្រូបង្វឹក Van Gaal ក្រោយបង្ហាញភាពលេចធ្លោនៅក្លិប Ajax។
កីឡាករវ័យ២១ បង្ហាញសមត្ថភាពបានល្អ ក្រោមការដឹកនាំដោយអតីតគ្រូបង្វឹក Erik ten Hag ដែលត្រូវបានរាយការណ៍ថា ធ្លាប់ព្យាយាមក្នុងការនាំយកខ្សែការពាររូបនេះទៅ Old Trafford។
លោក Van Basten បាននិយាយថា៖ “Ajax លេងបាល់យ៉ាងអស្ចារ្យ ដែលត្រូវអរគុណដល់ Jurrien Timber ហើយនិងក្រុមជម្រើសជាតិដែលលេងបានល្អ ក៏ត្រូវអរគុណដល់គេផងដែរ”។
“វាគួរតែមានពាក្យអរគុណដល់គេដែលយើងអាចលេងយ៉ាងងាយស្រួលពីតំបន់ខាងក្រោម។ Jurrien Timber ជាកម្លាំងធំបំផុតរបស់យើងនៅតំបន់ការពារ”។
“គេតែងតែបង្ហាញពីសមត្ថភាពដូច Nathan Ake ខណៈខ្សែការពារល្អបំផុត(Virgil van Dijk) បង្ហាញសមត្ថភាពទាបជាងគេក្នុងចំណោមអ្នកទាំង៣ ដែលជារឿងចម្លែក ដោយធ្វើការតែបន្ដិចបន្ដួចពេលចាប់ផ្ដើម build-up”៕
ប្រភព៖ talkSPORT