Cristiano Ronaldo មានការភ្ជាប់ទៅនឹងការចាកចេញពី Manchester United អំឡុងទីផ្សារដោះដូររដូវក្ដៅ ប៉ុន្ដែទីបំផុត គេនៅតែមិនអាចចាកចេញពី Old Trafford បាន។
ទន្ទឹមនឹងការភ្ជាប់ជាមួយក្លិបធំនៅអឺរ៉ុបដូចជា Chelsea និង Juventus ជាដើម, ខ្សែប្រយុទ្ធវ័យ៣៧ឆ្នាំរូបនេះ ក៏ត្រូវបានរាយការណ៍ថា មានការចរចាជាមួយក្លិបអារ៉ាប៊ីសាអ៊ូឌីត Al-Hilal ផងដែរ។
មានប្រភពមួយចំនួនបានបង្ហើបឱ្យដឹងថា មានសំណើទឹកប្រាក់ប្រមាណ២០០លានផោន ត្រូវបានដាក់នៅលើតុចរចា ជាមួយនឹងកុងត្រារយៈពេល២ឆ្នាំសម្រាប់ Ronaldo ដែលអាចឱ្យគេទទួលបានប្រាក់ឈ្នួលមួយអាទិត្យ ២លានផោន ប៉ុន្ដែចុងក្រោយការផ្ទេរនៅតែមិនអាចសម្រេចទៅបាន។
ពេលនេះ ប្រធានក្លិប Al-Hilal បាននិយាយថា បញ្ហាដែលមិនអាចនាំយក កីឡាករព័រទុយហ្កាល់បាន មិនមែនដោយសារលុយ ឬលក្ខខណ្ឌចរចាណាមួយ ជាមួយកីឡាកររូបនេះឡើយ។
និយាយនៅក្នុងឆាណែលយូធូបរបស់ Thamanya លោក Fahad ben Nafel បានរៀបរាប់ថា៖ “មែនយើង យើងបានចរចាជាមួយ Roanldo។ បញ្ហាមិនមែនលុយ ឬគោលការណ៍នោះទេ, Al Hilal អាចនាំយកតារឆ្នើមជាច្រើននៅលើលោក ប៉ុន្ដែវាជាការសម្រេចរបស់ មជ្ឈមណ្ឌលវិនិច្ឆ័យកីឡា ដែលរារាំងយើងពីការចុះឈ្មោះកីឡាករ”។
“យើងមិនបញ្ឈប់ការចរចាជាមួយកីឡាករនោះទេ ទោះបីជាមានការសម្រេចពិន័យក៏ដោយ ក៏យើងពន្យារពេលនៃការចរចាក្នុងដំណាក់កាលចុងក្រោយរហូតដល់ ការពិន័យត្រូវបានលើកលែង”៕
ប្រភព៖ MEN