ក្លិបអធិរាជស Real Madrid ថ្មីៗនេះ ត្រូវបានគេរាយការណ៍មកថា បានត្រៀមខ្លួនរួចស្រេចហើយ ក្នុងការនាំយកតារាឆ្នើមរបស់ខ្លួនម្នាក់ ដែលកំពុងដាក់ឱ្យក្លិបនៅអ៊ីតាលីខ្ចីជើង ត្រលប់មកកាន់ទឹកដីអេស្ប៉ាញវិញ ដើម្បីទុកជំនួសតំណែងរបស់កីឡាករ Marco Asensio ដែលអាចចាកចេញ ។
ពិតណាស់ Asensio ត្រូវបានភ្ជាប់ទំនាក់ទំនងយ៉ាងខ្លាំង ជាមួយនឹងការចាកចេញពីក្លិប Madrid នៅអំឡុងទីផ្សារដោះដូរកីឡាករ រដូវក្តៅកន្លងទៅ ដោយសារតែកុងត្រាបច្ចុប្បន្នរបស់គេ នៅសល់ត្រឹមតែមួយឆ្នាំទៀតប៉ុណ្ណោះ ។
ហើយដោយបានមើលឃើញពីស្ថានភាពបែបនេះហើយ ទើបរបាយការណ៍មួយ នៅក្នុងប្រទេសអេស្ប៉ាញ បានរាយការណ៍ឱ្យដឹងថាក្លិបប R.Madrid កំពុងមានជម្រើសនៅក្នុងចិត្តរួចស្រេចហើយ ជាមួយនឹងការនាំយក Brahim Diaz ត្រលប់មកកាន់ក្លិបវិញ ប្រសិនបើ Asensio ជ្រើសរើសយកការចាកចេញ ដោយគ្មានតម្លៃខ្លួន នៅរដូវក្តៅឆ្នាំក្រោយនោះ ។
គួរឱ្យដឹងថា Diaz ដែលធ្លាប់បានចំណាយពេលលេងឱ្យក្លិប La Liga នៅចន្លោះខែមករា ឆ្នាំ ២០១៩ ដល់ខែកញ្ញា ឆ្នាំ ២០២១ នោះ បច្ចុប្បន្នកំពុងតែបង្ហាញភាពលេចធ្លោ នៅឯក្លិប AC Milan ក្រោមលក្ខខណ្ឌខ្ចីជើងពីក្រុម Madrid ។
លើសពីនេះ ក្នុងរយៈពេលពីររដូវកាលកន្លងមក កីឡាករវ័យ ២៣ ឆ្នាំរូបនេះ បានចូលរួមចំណែករកបាន ១២ គ្រាប់ និងបញ្ជូនបាល់ឱ្យមិត្តរួមក្រុមចំនួន ៩ លើកមកហើយ ក្នុងការបង្ហាញខ្លួន ៨៦ ប្រកួត សម្រាប់ក្លឹបយក្សអ៊ីតាលី និងថែមទាំងបានជួយក្លិបនេះឈ្នះពាន Serie A កាលពីរដូវកាលមុនផងដែរ ៕
ប្រភព: Sporsmole