ពេលវេលានៃជំនួប Manchester Derby ដែលបងប្អូនរង់ចាំអស់កាលជាយូរ ក៏ត្រៀមនឹងចូលមកដល់នៅថ្ងៃអាទិត្យខាងមុខ ហើយគ្រប់គ្នាពិតជាចង់ដឹងខ្លាំង អំពីការរៀបប្រព័ន្ធលេងរបស់អ្នកចាត់ការក្រុមទាំងសងខាង មាន Erik ten Hag នៃក្លឹប Man Utd និង Pep Guardiola នៃក្លឹប Man City។
យ៉ាងណាតាមស្ថានភាពកីឡាករ ដែលយើងទទួលដំណឹងជាមុន ខាង United ឯណោះ តំបន់ខាងលើមានភាគរយខ្ពស់ គ្រូសញ្ជាតិហូឡង់ នឹងប្រើប្រាស់វត្តមានកីឡាករព័រទុយហ្គាល់នៅជម្រើសដំបូង ក៏ដោយសារតែគ្មានជម្រើសសំខាន់ក្នុងដៃ តួយ៉ាង Marcus Rashford និង Anthony Martial មិនទាន់ត្រលប់មកត្រៀមលក្ខណៈស្រួលបួលនៅឡើយ។
Martial មិនទាន់ត្រលប់មកហ្វឹកហាត់វិញទេ ដោយអវត្តមាន ៥ ប្រកួតកន្លងមក រីឯ Rashford ទើបរបួសសាច់ដុំកាលប៉ះ Arsenal ដើមខែកញ្ញា ហើយតាមដំណឹងក៏មិនទាន់ត្រៀមខ្លួនទាន់ពេលនៃប្រកួតសំខាន់ថ្ងៃអាទិត្យដែរ។ តាមសារព័ត៌មាន The Telegraph ចុះផ្សាយ ដូច្នេះតំណែងប្រយុទ្ធកណ្តាល ប្រាកដណាស់នឹងធ្លាក់មកលើ CR7 ជាក់ជាមិនខាន។
ចំណែកស្លាបសងខាង នៅតំបន់ប្រយុទ្ធ អាចជា Jadon Sancho និង Antony រីឯតំបន់ការពារ និងបម្រើមានភាគរយច្រើននឹងរក្សាដូចមុន បើតាមការជឿជាក់។ រំឭកឲ្យដឹងប្រកួតដ៏ធំនេះ នឹងមានផ្សាយផ្ទាល់លើទំព័រ CTS SPORT នាវេលាម៉ោង ០៨:០០ នាទីយប់ ថ្ងៃអាទិត្យ ទី ០២ តុលា៕
ប្រភព៖ The Telegraph