ខ្សែប្រយុទ្ធឆ្នើមរបស់ក្រុម Barcelona កីឡាករ Robert Lewandowski ត្រូវគេរាយការណ៍ថា នឹងមានឱកាស ក្នុងការបំបែកកំណត់ត្រាចាស់នៅក្របខ័ណ្ឌ La Liga ដែលបច្ចុប្បន្នកំពុងកាន់កាប់ដោយខ្សែប្រយុទ្ធ Cristiano Ronaldo សម្រាប់ការប្រកួតនៅចុងសប្តាហ៍នេះ ។
ចាប់តាំងពីផ្ទេរមក Barca កីឡាករ Lewandowski បានកត់ត្រាគ្រាប់បាល់ចំនួន ៨ គ្រាប់រួចមកហើយ ក្នុងការប្រកួត La Liga ៦ លើកចុងក្រោយ ខណៈគេក៏បានរកហេតទ្រីគផងដែរ ក្នុងជ័យជម្នះ ៥–១ ក្នុងពាន Champions League លើក្រុម Viktoria Plzen ។
បន្ទាប់ពីការចាប់ផ្តើមដ៏គួរឱ្យចាប់អារម្មណ៍ជាមួយ Barcelona នេះ Lewandowski មានឱកាសបំបែកកំណត់ត្រា La Liga របស់ Ronaldo នៅពេលត្រូវប្រកួតតទល់នឹងក្រុម Mallorca នៅថ្ងៃសៅរ៍នេះផងដែរ ។
គួរឱ្យដឹងថា កីឡាករវ័យ ៣៤ ឆ្នាំរូបនេះ ត្រូវការរកឱ្យបាន ៣ គ្រាប់ នៅក្នុងការប្រកួតនេះ ដើម្បីបន្ថែមចំនួនគ្រាប់សរុប ១១ គ្រាប់ ឱ្យលើស Cristiano Ronaldo សម្រាប់ការប្រកួតបើកឆាក ៧ លើកដំបូងនៅ La Liga ខណ:កីឡាករព័រទុយហ្គាល់ អាចរកបាន ១០ គ្រាប់ នៅអំឡុងរដូវកាល ២០១៤–១៥ ឱ្យក្រុម Real Madrid ៕
ប្រភព: Sporstmole