បើទោះបីសេសសល់កុងត្រាដល់ចុងខែមិថុនា ឆ្នាំ ២០២៧ តែយ៉ាងណាក្លឹបមេឃខៀវ Manchester City ហាក់នៅតែចង់បន្តកុងត្រាថ្មី ឲ្យ Erling Haaland បន្ទាប់លេចលឺក្លឹបធំៗដទៃព្យាយាមចង់បាន។ ប្រសិនកីឡាករព្រមចុះហត្ថលេខានោះតម្លៃខ្លួនក៏នឹងកើនឡើង ដែលមានន័យថាបណ្តាក្លឹបខាងក្រៅ ពិតជាពិបាកនឹងចរចាក្នុងការនាំយក។
បច្ចុប្បន្នយុវជនសញ្ជាតិន័រវេស រកបាន ១១ គ្រាប់នៅ ៦ ប្រកួតក្របខ័ណ្ឌ Premier League ហើយរាត្រីនេះ គេទទួលភារកិច្ចធំ ត្រៀមតតាំងក្លឹប Manchester United នៅឯកីឡដ្ឋាន Etihad ជាប្រកួត Manchester Derbyជុំទី ១ ក្នុងក្របខ័ណ្ឌ Premier League។ បើរកបាន ៣ គ្រាប់ នោះគេនឹងក្លាយជាកីឡាករដំបូង អាចរកបាន Hat-trick ៣ ប្រកួតជាប់ក្នុងដី ជាលើកដំបូងទៀតផង។
សព្វថ្ងៃនេះ កីឡាករវ័យ ២២ ឆ្នាំ រកបានចំណូលចូលហោប៉ៅ ៣៧៥ ០០០ ផោន/សប្ដាហ៍ ពីក្លឹប Man City ដែលរាប់ជាកីឡាករស៊ីថ្លៃបំផុតមួយ ស្មើទំហំប្រាក់ចំណូលរបស់ Kevin de Bruyne។ យ៉ាងណា City ចង់ប៉ះប៉ូវបន្ថែមទៀតឲ្យកីឡាករ តាមរយៈការបន្តកុងត្រាថ្មី ដោយមិនបន្ថែមប្រាក់ឈ្នួលអ្វីទេ តែចង់បន្ថែមប្រាក់លើកិច្ចព្រមព្រៀងឧបត្ថម្ភនានា ដូចលក្ខខណ្ឌនៃការរកគ្រាប់បាល់ លក្ខខណ្ឌឈ្នះពានបុគ្គលអ្វីជាដើម។
យើងក៏មិនច្បាស់ថា សាមីខ្លួននឹងយល់ព្រមឬអត់ដែរ ដ្បិតអីឪពុកបង្កើតរបស់កីឡាករ ហាក់ឲ្យតម្រុយជាមុន ថាកូនប្រុសខ្លួនឈរជើងឲ្យ City ត្រឹម ៤ ឆ្នាំអីប៉ុណ្ណោះឯង នឹងជ្រើសយកការចាកចេញទៅលីគដទៃហើយ ពោលចង់លេងឲ្យគ្រប់លីគកំពូលទាំងអស់នៅអឺរ៉ុប ដូច្នេះភាគរយខ្ពស់ អាចទ្រនំបន្ទាប់នៅ La Liga, Ligue 1 ឬ Serie A៕
ប្រភព៖ Daily Star