ខ្សែបម្រើ Aurelien Tchouameni បាននិយាយអំពីការផ្ទេររូបគេពីក្លិប AS Monaco មកកាន់ Real Madrid អំឡុងទីផ្សារដោះដូរ នារដូវក្ដៅនេះ។
កីឡាករជម្រើសជាតិបារាំងរូបនេះ បានបង្ហាញភាពលេចធ្លោសម្រាប់ប៉ុន្មានខែដំបូង ក្នុងកីឡដ្ឋាន Santiago Bernabeu បន្ទាប់ពីចូលរួមក្លិបអេស្ប៉ាញ ក្នុងតម្លៃផ្ទេរ ៨០លានអឺរ៉ូ កាលពីខែមិថុនា។
ទោះបីជាមានតម្លៃខ្ពស់ សម្រាប់តម្លៃនៃការផ្ទេរ ប៉ុន្ដែ Tchouameni សម្របខ្លួនបានយ៉ាងល្អទៅនឹងការលេងសម្រាប់ក្រុមលោក Carlo Ancelotti។
កីឡាករវ័យ២២ឆ្នាំ ពេលនេះបាននិយាយបើកកាយ ចំពោះការសម្រេចចិត្តចូលរួម Real Madrid និងការប្រៀបធៀបជាមួយ រៀមច្បងបារាំង Paul Pogba។
Tchouameni បានថ្លែងប្រាប់ សារព័ត៌មានថា៖ “ខ្ញុំមិនមែនជា Pogba ថ្មីនោះទេ, ខ្ញុំគឺ Aurelien Tchouameni, ខ្ញុំព្យាយាមសរសេររឿងរ៉ាវផ្ទាល់ខ្លួនរបស់ខ្ញុំ”។
“Pogba ជាកីឡាករដែលខ្ញុំតាមដាន ពេលខ្ញុំនៅពីក្មេង។ យើងលេងនៅក្នុងតំណែងដូចគ្នា ប៉ុន្ដែមានតែ Pogba ម្នាក់ប៉ុណ្ណោះ”។
“ខ្ញុំព្យាយាមក្នុងការរួមចំណែកជួយក្រុម ប៉ុន្ដែនៅពេលដែល Kante និង Pogba ត្រលប់មកវិញ គ្រូបង្វឹកនឹងជ្រើសរើស ហើយខ្ញុំនឹងប្រឹងឱ្យអស់លទ្ធភាពដើម្បីជាប់ជម្រើសដំបូង”៕
ប្រភព៖ Football Espana