Erling Haaland ទើបតែផ្លាស់មក Premier League បានប៉ុន្មានខែ តែមើលការលេងរបស់គេ ប្រៀបដូចកីឡាករកាន់ឆ្នាំ ហាក់សម្របបានលឿន និងបង្កើតគុណផលហួសការរំពឹងទុករបស់មនុស្សរាល់គ្នា។ លេងនៅលីគលំដាប់ទី ១ ក្នុងតំបន់អឺរ៉ុប តែកីឡាករន័រវេស ហាក់មិនថមថយសោះ ជាមួយការរកគ្រាប់បាល់ទល់ក្លឹបកំពូល។
ដូចយប់មិញប៉ះ Manchester United យុវជនវ័យ ២២ ឆ្នាំ ថែមទាំងអាចរកបាន ៣ គ្រាប់ និង Assist ២ លើកផងដែរ នៅជ័យជម្នះ ៦-៣ ដែល City បានយកឈ្នះក្នុងនាមជាក្រុមភ្ញៀវ។ ការរកបាន Hat-trick នេះ គឺរាប់ជាកីឡាករដំបូង រកបាន Hat-trick ក្នុងទឹកដីខ្លួនឯង ៣ ប្រកួតជាប់ មិនធ្លាប់កើតមានពីមុនមកឡើយនៅប្រវត្តិសាស្រ្ត Premier League។
ដោយឡែកគេក៏ក្លាយជាកីឡាករដែលប្រើពេលតិចបំផុត អាចរកបាន Hat-trick ដល់ទៅ ៣ លើក នោះគឺត្រឹម ៨ ប្រកួតក្នុងក្របខ័ណ្ឌ Premier League ដែលកំណត់ត្រាបែបនេះ ខានកើតមានតាំងឆ្នាំ ១៩៩៨ ជំនាន់ Michael Owen ធ្វើអស់ល្អបំផុត គឺ ៤៨ ប្រកួត ដែលចំណោមនោះ គេរកបានឲ្យ Liverpool ទល់ក្លឹប Sheffield Wednesday, Newcastle United និង Nottingham Forest។
យើងកំពុងរង់ចាំមើល តើ Haaland អាចបន្តការរកគ្រាប់បាល់ ដល់ក្លាយជាអ្នកធ្វើបានច្រើនគ្រាប់បំផុតប្រចាំរដូវកាលទោល Premier League ដែរឬយ៉ាងណា? កំណត់ត្រាចាស់គ្រោងដោយ Andy Cole និង Alan Shearer មាន ៣៤ គ្រាប់ ដែលជាការប្រកួតរដូវកាលមាន ៤២ ជុំ ឥឡូវ Haaland ៨ ជុំមាន ១៤ គ្រាប់ អ៊ីចឹងត្រូវការ ២១ គ្រាប់ទៀត ចាំមើល ៣០ ជុំអាចធ្វើបានឬយ៉ាងណា?
ប្រភព៖ Metro