ក្លឹបចចក Wolverhampton Wanderers មិនទាន់សម្រេចប្រកាសវត្តមានអ្នកចាត់ការលោក Julen Lopetegui ជាផ្លូវការនៅឡើយ ដ្បិតអីសព្វថ្ងៃនៅបន្តដាក់លោក Steve Davis ឲ្យដឹកនាំបណ្ដោះអាសន្ន។ យ៉ាងណាគេជឿថា ផែនការណ៍ក្លឹបគឺបានរៀបចំរួចរាល់ហើយ នឹងចាត់តាំងគ្រូសញ្ជាតិអេស្ប៉ាញ ឲ្យចូលកាន់ជាផ្លូវការឆាប់ៗនេះ។
ទោះជាយ៉ាងណា អតីតអ្នកចាត់ការក្លឹប Sevilla ក៏បានរាយការណ៍ទៅថ្នាក់លើក្លឹបថ្មីរបស់ខ្លួនរួចជាស្រេច ឲ្យសម្លឹងមើលជាបណ្តើរៗ នូវកីឡាកររបស់ក្លឹប Real Madrid ដែលជាសមាជិកក្រៅជម្រើស ហើយជឿថាគុណភាពរបស់គេ គួរតែអាចមកជោគជ័យជាមួយក្លឹបនៅ Premier League។
តាមសារព័ត៌មាន The Telegraph បានឲ្យដឹងថា Lopetegui ចង់ប្រើប្រាស់តំណែងរបស់ខ្លួន ចុះហត្ថលេខាយក Mariano Diaz នាពេលខាងមុខ ពោលអាចជាបើកការចរចានាខែមករា ឬទីផ្សារដោះដូររដូវរងា។ ជួនពេលដែលសុពលភាពកុងត្រាសល់ត្រឹមចុងខែមិថុនា ឆ្នាំ ២០២៣ ជាហេតុនាំឲ្យតម្លៃខ្លួន Diaz ក៏អាចទាប ក្រោម ៥ លានផោនក៏ថាបាន។
យើងមិនច្បាស់ថា Real Madrid នឹងសម្រេចចិត្តបែបណាទេ តែភាគរយច្រើនប្រាកដនឹងលក់ ព្រោះសឹងតែលែងប្រើកីឡាករអេស្ប៉ាញទៅហើយ។ ដូចរដូវកាល ២០២២/២៣ ឈរជើង ៤ ប្រកួត ស្មើនឹង ១៤ នាទីគត់លើទីលាន ពោលបម្រុងប៉ុន្មាននាទីចុងតង់នោះឯង៕
ប្រភព៖ The Telegraph