ក្រុមតោខៀវ Chelsea ត្រូវបានធ្លាក់ចេញពីពានរង្វាន់ Carabao Cup ដ៏គួរឱ្យភ្ញាក់ផ្អើល បន្ទាប់ពីរងបរាជ័យ នៅក្រោមថ្វីជើងរបស់ក្រុម Manchester City ដោយលទ្ធផល ២–០ កាលពីយប់មិញ ។
ទោះជាយ៉ាងណាក៏ដោយ គ្រូបង្វឹកក្រុមតោខៀវ លោក Graham Potter នៅតែបានបង្ហាញការកោតសរសើរយ៉ាងខ្លាំង ទៅលើកីឡាករវ័យក្មេង Lewis Hall ថាបានបង្ហាញគុណផលលេងដ៏អស្ចារ្យមួយ នៅពេលគេទទួលបានឱកាសចូលរួមជាមួយឈុតធំរបស់ក្រុមជាលើកទី ២ នៅឯកីឡដ្ឋាន Etihad ។
ដោយឡែក នៅក្រោយចប់ការប្រកួតនោះ លោក Potter បាននិយាយប្រាប់ Sky Sport អំពី Hall ថា ៖ ” គាត់ធ្វើបានយ៉ាងល្អ ជាមួយនឹងការបង្ហាញគុណផលដ៏អស្ចារ្យ គួបផ្សំជាមួយគុណភាពដ៏ខ្ពស់។ អ្នកអាចមើលឃើញអំពីការខិតខំប្រឹងប្រែងរបស់គាត់ និងជាកីឡាករដែលមានទំនួលខុសត្រូវខ្ពស់ ” ។
គ្រូបង្វឹករូបនេះ បានបន្ថែមទៀតថា ៖ ” ការទាត់បាល់ចូលទី គឺជារឿងដ៏ពិបាកបំផុត ដូច្នេះហើយវាជាអ្វីដែលគាត់មិនអាចធ្វើបាននៅថ្ងៃនេះ ប៉ុន្តែអ្វីៗគ្រប់យ៉ាងដែលគាត់បានធ្វើលើទីលាន គឺពិតជាអស្ចារ្យខ្លាំងណាស់ ” ។
គួរបញ្ជាក់ផងដែរថា បន្ទាប់ពីលែងមានឱកាសឡើងទៅជុំបន្ទាប់ពាន Carabao Cup នេះ ក្រុម Chelsea និងត្រូវបន្តធ្វើដំណើរទៅកាន់ទឹកដីរបស់ក្រុម Newcastle ដើម្បីពានរង្វាន់ Premier League នាថ្ងៃសៅរ៍ខាងមុខ ដែលជាប្រកួតលើកចុងក្រោយ មុនព្រឹត្តិការណ៍ World Cup មកដល់ ៕
ប្រភព: Metro