អ្នកចាត់ការជម្រើសជាតិអង់គ្លេស លោក Gareth Southgate ហាក់បានមើលរំលងកីឡាករ ២ រូប នៅតំបន់ការពារ និងបម្រើ ហើយតាមការជឿជាក់របស់ Gary Neville ជាអ្នកវិភាគមួយរូប ជឿជាក់ថា បើទៅកាន់ជម្រើសជាតិដទៃ ម្ល៉េះនឹងបានជាប់ជម្រើសដំបូងហើយ មិនអង្គុយបម្រុងនោះឡើយ។
នោះគឺការពារស្លាប Trent Alexander-Arnold និងបម្រើ Phil Foden ពួកគេអង្គុយបម្រុងពេញម៉ោង នៅប្រកួតស្មើ ០-០ ទល់សហរដ្ឋអាមេរិកកាលពីយប់មិញ។ តាមការលើកឡើងរបស់លោក Neville៖ “ខ្ញុំយល់ថា Southgate ធ្វើបានល្អណាស់ គឺល្អជាងគេហើយតាំងពីជំនាន់ Sir Alf Ramsey តែសារនេះ យើងបានមើលរំលងកីឡាករមានទេពកោសល្យ ដូច Trent Alexander-Arnold និង Phil Foden”។
លោកបន្តថា៖ “ពួកគេជាកីឡាករលំដាប់ World class តែការដែលអង្គុយបម្រុងមិនបានងើបចេញមកលេងសោះ គឺជារឿងដ៏គួរឲ្យខក.ចិត្តបំផុតហើយ នេះបើនៅជាតិសាសន៍ដទៃដូចអេស្ប៉ាញ ប្រេស៊ីល ឬបារាំង ប្រាកដណាស់នឹងបានជាប់ជម្រើសដំបូងមិនខាន”។
“ខ្ញុំយល់គួរសមដែរ បើយើងមើលការការពាររបស់ Alexander-Arnold កន្លងមក តែនៅប្រកួតសារនេះ ដែលក្រុមយើងខ្វះភាពច្នៃប្រឌិតក្នុងការបង្កើតឱកាស ម្ល៉េះហើយគេគួរតែទទួលបានឱកាសចូលរួម”។ គួរឲ្យដឹងដែរថា អង់គ្លេសបន្តឈរលេខ ១ ក្នុងពូល B មាន ៤ ពិន្ទុ នាំមុខលើអ៊ីរ៉ង់មាន ៣ ពិន្ទុ សហរដ្ឋអាមេរិក ២ ពិន្ទុ និងវែល ១ ពិន្ទុ៕
ប្រភព៖ Metro