យោងតាមរបាយការណ៍ចុះផ្សាយចុងក្រោយមួយ បានបង្ហាញឱ្យដឹងថា តារាឆ្នើមវ័យក្មេងរបស់ក្លិប Barcelona បានដាក់ឈ្មោះក្លិបបិសាចក្រហម Manchester United ថាជាក្លិបតែមួយគត់ ដែលគេចង់ផ្ទេរទៅលេងឱ្យ ប្រសិនបើត្រូវដើរចេញពីទឹកដី Camp Nou ទៅនោះ ។
ជាក់ស្តែងកីឡាករដែលចង់សំដៅលើនោះ គឺ Alejandro Balde បន្ទាប់ពីគេបានបង្ហាញភាពលេចធ្លោមួយ នៅក្រោមការដឹកនាំរបស់គ្រូបង្វឹក លោក Xavi ដោយបានចូលទៅបំពេញតំណែងរបស់ខ្សែការពារ Jordi Alba និងបានចូលលេងជម្រើសដំបូង ១២ លើករួចមកហើយ ក្នុងការបង្ហាញខ្លួនសរុប ១៤ ប្រកួតនៅក្នុងលីគរដូវកាលនេះ ។
ជាងនេះ ទៅទៀត គេក៏ទទួលបានការកោះហៅឱ្យចូលលេងក្នុងក្រុមជម្រើសជាតិអេស្ប៉ាញ សម្រាប់ពានរង្វាន់ World Cup នៅឯប្រទេសកាតារ ឆ្នាំ ២០២២ នេះទៀតផង ដូច្នេះហើយទើបគេមិនជឿជាក់ថា Balde អាចនឹងចង់ផ្ទេរចេញពីក្លិប Barca នៅក្នុងពេលឆាប់ណាមួយនោះឡើយ ។
តែទោះជាយ៉ាងណាក៏ដោយ អំឡុងពេលចូលរួមក្នុងបទសម្ភាស ជាមួយ Mundo Deportivo ខ្សែការពារវ័យ ១៩ ឆ្នាំរូបនេះ ត្រូវបានគេសួរនាំថា តើក្លិបណាមួយដែលគេចង់ផ្ទេរទៅចូលរួមបំផុត ក្រៅតែពី Barcelona ?
យ៉ាងណាមិញ ដោយមិនបានស្ទាក់ស្ទើយូរនោះឡើយ Balde បានឆ្លើយតបវិញភ្លាមថា ៖ ” គឺក្លិប Manchester United “។ ទន្ទឹមនឹងនេះកុងត្រាបច្ចុប្បន្នរបស់ Balde នៅទឹកដី Camp Nou នៅតែមានរយ:ពេលរហូតដល់ឆ្នាំ ២០២៤ ឯណោះ ៕
ប្រភព: Metro