ក្រុមមាន់គកបារាំង ជាជម្រើសជាតិដំបូងនៅ World Cup ដែលបានធានាកៅអីឆ្ពោះទៅកាន់វគ្គ ១៦ ក្រុមចុងក្រោយ បន្ទាប់ការយកឈ្នះពីរប្រកួតជាប់ទៅលើអូស្រ្តាលី និងដាណឺម៉ាកថែមទៀតកាលពីយប់មិញ។ ប្រកួតបន្ទាប់របស់ពួកគេ រំឭកឲ្យគ្នាយើងដឹង គឺត្រូវប៉ះក្រុមបាតពូលទុយណេស៊ី។
ទោះជាយ៉ាងណាក្រឡេកទៅប្រកួតនៅយប់មិញ ក្រុមដឹកនាំដោយអ្នកចាត់ការលោក Didier Deschamps ពិតជាធ្វើបានល្អ តាមរយៈការយកឈ្នះ ២-០ ទៅលើដាណឺម៉ាក ហើយក៏មានគ្រាប់បាល់របស់យុវជនឆ្នើម Kylian Mbappe ផងដែរ។ តាមទម្រង់លេងនោះសោត អតីតជើងចាស់លោក Alan Shearer ក៏បានមើលឃើញថា យុវជនរបស់ក្លឹប PSG ពិតជាមិនមានចន្លោះប្រហោងអ្វីឡើយនៅព្រឹត្តិការណ៍សារនេះ។
លោក Shearer ប្រាប់ទៅប៉ុស្តិ៍ BBC Radio 5 Live យ៉ាងដូច្នោះថា៖ “ខ្ញុំមើលអត់ឃើញចំណុចខ្សោយរបស់ Kylian Mbappe ក្នុងការប្រកួតទេ ខ្ញុំនិយាយតាំងពីដើមហើយ គេជាកីឡាករមានទេពកោសល្យ គេជាតារាឆ្នើមលំដាប់កំពូលមួយរូប”។
លោកបន្ត៖ “អ្នកចង់បានអី ចង់បានការប៉ះ តិចនិក ជើងឆ្វេង ជើងស្តាំ ការរត់ សមត្ថភាពបញ្ចប់ទី គ្រាប់បាល់របៀបម៉េចក៏គេធ្វើបានដែរ នេះអត់មានចំណុចខ្សោយឡើយ និយាយទៅ Mbappe ពិតជាអស្ចារ្យ ជក់ចិត្តនឹងមើលការលេងរបស់គេ ជាពិសេសក្នុងប្រអប់គ្រោះថ្នាក់ឲ្យបារាំង”៕
ប្រភព៖ BBC